Read tiv Ekesodu 1 Bible Online

Ekesodu 1 - tiv bible

Ekesodu 1

¹Ka ati a ônov mba Iserael mba ve va ken Igipiti ne; ve va a Yakob imôngo, hanma or a ior mba hen ya u nan:

²Ka Ruben man Shimeon man Levi kua Yuda,

³man Isakar man Sebulon kua Benyamin;

⁴man Dan kua Nafetali, man Gadi kua Asher.

⁵Ior mba ve due ken Yakob cii ve lu akunduatargber; Yosev yô, vande lun ken Igipiti.

⁶Tsô Yosev kpe a anngôôv nav kua kov la cii.

⁷Kpa Mbaiserael mar ngee, ve lu seer a seer yemen hemen hemen, ve taver kpishi; ve iv ken tar la.

⁸Tsô tor ugen u he tema tor ken Igipiti, u a fa kwagh u Yosev ga yô.

⁹Nahan a kaa a ior nav er: Nenge, nongo u Iserael ne, ve hemba se iyenge kua agee kpaa;

¹⁰yô, va, sé hen kwagh u sé er; sha er ve̱ de kera seer a seer iyenge er iyange i ityav á mough yô, ve̱ de te ken mbaihomov asev, ve̱ nôngon ityav a vese, ve̱ mough ve̱ due ken tar ne ga.

¹¹Tsô ve ver mbanengen sha ve, sha u kighir ve, ve̱ er tom u ican. Ve maa Farao agar a koson akaa, ka Pitom man Raamse.

¹²Er a seer ve ican yô, ve di ve seer a seer iyenge kua u samber kpaa. Kwagh u Mbaiserael cier ve iyol.

¹³Nahan Mbaigipiti tsule Mbaiserael gba eren tom u ican;

¹⁴ve vihi ve asema sha tom u ican, tom u hôron inya man u gbidyen akam man hanma injatom i ken ityev, ityom la ve tsule ve er, ve̱ er i.

¹⁵Shi tor u Igipiti wa kasev mba Heberu mba kôron mar kwagh, u môm iti na er Shifera, ugen la yô, er Pua,

¹⁶a kaa a ve er: Zum u nea kôron kasev mba Heberu mar yô, shighe u ve lu sha ikônough ki maregh la je, né nenge a lu nomso yô, né wua; a lu u kwase yô, né de.

¹⁷Kpa ve mbakôronmar mbala, ve cian Aôndo, nahan ve er er tor u Igipiti wa ve kwagh la ga, ve de ônov mba nomso ve lu uma.

¹⁸Tsô tor u Igipiti yila kasev mba kôron mar mbala, a kaa a ve er: Ka nyi ne er nahana, ne de ônov mba nomso ve lu uma?

¹⁹Ve kasev mba kôron mar mbala ve kaa a Farao er: Kasev mba Heberu mba er kasev mba Igipiti nahan ga, ve taver ayol, ka ve mar je er kasev mba kôron mar ve lu a va hen ve ga la.

²⁰Nahan Aôndo ver kasev mba kôron mar mbala doo doo; ior mbala kpaa seer a seer iyenge, ve hingir u lun a agee.

²¹Er kasev mba kôron mar mbala lu cian Aôndo yô, A wa ve iyagh.

²²Tsô Farao kaa a ior nav er: Hanma wannomso u i mar yô, gbihi nen un shin ifi u Nil, kpa hanma wankwase yô, de nen un a̱ lu uma.