Read tiv Ekesodu 12 Bible Online

Ekesodu 12 - tiv bible

Ekesodu 12

¹Tsô TER ôr kwagh a Mose man Aron ken tar u Igipiti, A kaa er:

²Uwer ne u̱ lu ne uwer u hiihii ken iwer, u̱ lu ne uwer hiihii u inyom.

³Ôr nen kwagh a mkohol u ior i Iserael cii, kaa nen ner: Uwer ne sha ayange a u pue la yô, hanmô ve nana̱ kôr gumile sha uya mba uter vev ser ser, hanma ya gumile a lu môm;

⁴aluer gumile una gande ya la yô, or la vea or u nan we ndor a nan la, vea kôr môm, sha mlu u ior mba ker; ka sha mye u hanma or man né ôr iyenge sha ci u gumile la ye.

⁵Yô, gumile wen a̱ de lu a ihogholough iyol ga, a̱ lu u nom u a kom inyom i môm yô, ka ken iyôngo shin ivo man ne kôr un ye;

⁶koso nen un zan zan ayange pue kar anyiin a uwer ne; mkohol u ior i Iserael cii, ve̱ sôngo un aikighe.

⁷Ve̱ er awambe na ve̱ shighe sha ikpande i ambusu a hunda man kpandehunda u sha, ken ayou a vea ya un keregh la.

⁸Ve̱ ya inyam la tugh mbula je, ve̱ mgbagh a mgbagh sha usu; ve̱ ya i sha bredi u i we kwa sha mi ga yô, kua ikaiue i yuan.

⁹De ye nen i kôgh ga, shin u jiir a jiir sha mnger kpaa ga, kpa i mgbagh a mgbagh i sha usu, ityough nagh man angahar a na kua ikav mbi kimi kpaa.

¹⁰De deen nen ma kwagh na, a̱ luun her zan zan sev mbu̱ aven ga; kpa kwagh u una lu her zan zan sev a av yô, nande nen un sha usu je.

¹¹Fiir nen akondo iwenge, lu nen a akôv shin angahar man gbough ken uwe, kape né ya un la; ya nen un fele fe fele; ka Paseka u TER je la.

¹²Gadia hen tugh mbula, Me zende ken tar u Igipiti cii, Me wua hanma waniunda ken tar u Igipiti cii, u or kua u zendenya kpaa; mbaaôndo mba Igipiti cii kpaa, Me ôr ve ijir, Me tsaha ve; ka Mo TER.

¹³Awambe la, a̱ lu ne ikav sha uya mba ne lu ker la; zum u Me nenge awambe la yô, Me aver ne, Me kar; nahan kwagh u bo u timin ne, una kera tser ne ga, zum u Me tsahan tar u Igipiti la.

¹⁴Iyange ne, i̱ lu ne iyange i umbur, ver nen i, i̱ hingir iniongo i civir TER; yaan nen i sha ikov ikov, i̱ hingir ne tindi u eren nahan gbem sha won je.

¹⁵Ayange ataankarahar cii, né yaan bredi u i we kwa sha mi ga yô; hii sha iyange i hiihii la je, né dugh kwa ken uya enev kera; gadia hanma or u nana ya bredi u a lu a kwa, hii sha iyange i hiihii zan zan sha iyange i ataankarahar la yô, i̱ dugh or la ken Iserael kera.

¹⁶Sha iyange i hiihii la, né er icighanmkohol, man sha iyange i sha utaankaruhar la kpaa, shi á lu icighanmkohol; á kera er ma tom sha a je ga, saa di kwagh u hanma or nana ya tsô, ka kwagh la tseegh né er ye.

¹⁷Yô, waan nen iniongo i bredi u i we kwa sha mi ga la iko, gadia ka sha iyange la je, M due a akum a en ken tar u Igipiti kera; ka nahan man né waan iyange ne iko sha ikov ikov je, á hingir ne tindi u eren nahan gbem sha won ye.

¹⁸Sha uwer u hiihii ayange a u pue kar anyiin la, aikighe, né ya bredi u i we kwa sha mi ga yô, zan zan á ar sha ayange a u, ikundu kar môm la, aikighe.

¹⁹Ayange a ataankarahar la cii, i̱ de kera zough a kwa ken uya enev ga; gadia hanmô u nana ya kwagh u i we kwa sha mi yô, or la á dugh nan ken mkohol u ior i Iserael kera, shin nana lu shiror, shin a lu or u tar la kpaa.

²⁰Hanma kwagh u i we kwa sha mi yô, de ye nen un ga; sha ajiir a en a teman cii, né yaan bredi u i we kwa sha mi ga yô.

²¹Tsô Mose yila mbatamen mba Iserael cii, a kaa a ve er: Za, za kôr nen ilev sha ci u uya enev, sôngo nen Paseka.

²²Yô, tôô nen ikagh i hisop civ nen shin awambe a shin tasa la, shighe nen awambe a shin tasa la sha kpandehunda u sha kua ikpande i ambusu a hunda ihiar la kpaa; mô wen môm nana̱ de kera duen sha hunda u iyou i nan ga, saa sev mbu̱ av.

²³Gadia TER Una va kar, sha u za tsahan Mbaigipiti; kpa zum u Una nenge awambe sha kpandehunda u sha man sha ikpande i ambusu a hunda ihiar yô, TER Una aver hunda la, Una kar, Una rumun Ortiminior er a̱ nyôr ken ayou a en, a̱ tsaha ne ga.

²⁴Waan nen kwagh ne iko a̱ hingir ne tindi u eren nahan, ne kua ônov enev kpaa gbem sha won je.

²⁵Nahan zum u né va ken tar u TER Una na ne, er A vande tôndon zwa la yô, waan nen iko u̱ eren kwagh ne.

²⁶Man aluer ônov enev vea pine ne er: Kwagh u ne eren ne yô, inja na nana?

²⁷Yô, kaa nen ve ner: Ka nagh ku sôngon ku Paseka u TER, u iyange aver ayou a Mbaiserael ken tar u Mbaigipiti, kar la, zum u A tsaha Mbaigipiti man gema yima ayou a ase la. Tsô ior gure kuma ityouv inya, ve wuese.

²⁸Tsô ônov mba Iserael yem za er nahan; er TER kaa Mose vea Aron nahan, kape ve er je la.

²⁹Tsô ka kom ateghôtôutu yô, TER wua ônovmbaiundav mba ken tar u Igipiti cii, hii sha waniunda u Farao u ma a tem sha ikônough nagh ki torough la je zan zan ar hen waniunda u orkwar u a lu ken gaadi, kua ônovmbaiundav mba uzendenya cii kpaa.

³⁰Tsô Farao nder, un kua mbatomov nav cii man Mbaigipiti cii, i ger mliam ken Igipiti ting, gadia ma ya u ikomor de lun ker yô, lu ga.

³¹A yila Mose man Aron tugh tugh, a kaa er: Mough, due nen ken ior av kera, ne kua Mbaiserael, yem za civir nen TER er ne kaa nahan.

³²Kura nen iyôngo man ivo yen kua abua a en er ne kaa nahan, yem nen; verem nen doo doo.

³³Mbaigipiti gba torough a ior mbala, er ve̱ due ken tar la kera fefa; gadia ve kaa er: Se mba kpen cii.

³⁴Ior tôô mwem vem ma hôron ma i lu a wa kwa sha mi ga yô, kua mbaakpela mba hôron mi kpaa, ve kange ken akondo a ve, ve tôô sha avande.

³⁵Mbaiserael er sha imo i Mose la; ve sôn Mbaigipiti ikav mbi hweev mbi azurfa man mbi zenaria kua akondo kpaa.

³⁶TER er, i doo Mbaigipiti a ior mbala, nahan ve na ve kwagh u ve sen yô. Ve kungu Mbaigipiti.

³⁷Tsô Mbaiserael mough hen Ramese gba yemen hen Sukoti; ior lu er dubu deri ataratar nahan, ve lu zan angahar, nomso tseegh; i wa mbayev ker ga.

³⁸Ikpelaior igen i i lu nungwa nungwa la kpaa, gba yemen a ve imôngo, man ivo kua abua kpaa, ilev ngee je zua ga.

³⁹Ve kaa umasa mba i we kwa sha mi ga yô, sha mwem ma hôron ma ve dugh a mi ken Igipiti la, gadia i lu a wa ma kwa ga; gadia i zenda ve a zenda ken Igipiti kera, ve fatyô u timbir ga, nahan kwaghyan u gbenda kpaa ve er ga.

⁴⁰Mtse u Mbaiserael ve tsa ken Igipiti yô, kuma anyom deri unyiin man ikundugber.

⁴¹Tsô anyom deri unyiin man ikundugber nga kar yô, sha iyange la je, akumaior a TER cii due ken tar u Igipiti.

⁴²Ka tugh mbu wan mbu iko kpishi, civir TER min, sha ci u mdugh u A due a ve ken tar u Igipiti la; mbun ka tugh mbu TER, mbu Mbaiserael cii vea waan mbu iko sha ikov ikov cii yô.

⁴³Tsô TER shi kaa a Mose vea Aron er: Ka tindi u Paseka ne: Ma or u ikur igen nana̱ de ye un ga.

⁴⁴Kpa kpan u hanma or nan yam sha inyar, aluer u tsôngon un kera yô, zum la á gbaa yan tsô.

⁴⁵Kpa shiror vea ortom u sha tôndo yô, ve̱ de ye un ga.

⁴⁶I̱ ya un ken iyou i môm; de dugh a ma ivurugh ki inyamegh ken won ga; man de sombon kuhe na kpaa ga.

⁴⁷Mkohol u ior i Iserael cii a̱ eren nahan.

⁴⁸Aluer ma shiror u nan nyer u a nyôr á sar nan pe yan Paseka, civir TER yô, i̱ tsôngo nomso mba hen ya u nan, man nana kporom nana za ya ye; nana hingir er ka or u tar la yô; kpa oripusu môm môm nana̱ de ye un ga.

⁴⁹Tindi ngu môm sha ci u or u tar la kua shiror u a va nyer ne a nyôr la kpaa.

⁵⁰Mbaiserael cii ve er nahan; er TER kaa Mose vea Aron yô, kape ve er sha mi je la.

⁵¹Tsô sha iyange la je, TER due a Mbaiserael ken tar Igipiti akum akum.