Read tiv Ekesodu 15 Bible Online

Ekesodu 15 - tiv bible

Ekesodu 15

¹Tsô zum la Mose kua Mbaiserael gba wan icam ne teren TER, kaan er: Me wa icam me ter TER, gadia A hemba tser tser; nyinya kua orhendan un kpaa, A haa ve shin zegemnger.

²TER ka agee am man icam yam kpaa, A hingir myom wam kpaa. Ka Aôndo wam, me wuese Un; Aôndo u terem, me kende Un sha.

³Ter ka orutya je; iti na er TER.

⁴Akeke a Farao kua ikumutya na kpaa, A haa ve shin zegemnger; mbautyav nav mba hemban cii kpaa, ve mire shin Zegemnger u Nyian.

⁵Aiv cir ve, ve sen shin iv er iwen nahan.

⁶Uwegh Ough ku yanegh, TERE, ku a icivir, sha ci u agee Ou; uwegh Ough ku yanegh, TERE, ku her orihom.

⁷Sha ivesen i icivir You yô, U gbihi mba ve hendan a We mbala inya; U tindi iyugh You va nande ve kera er adenga a alakema nahan.

⁸Sha iôôn i ahenga Ou la, mngerem ta tihi, uikuwanmbamngerev tile sha er ka tihi nahan aiv kôrough shin sema u zegemnger.

⁹Orihom kaa er: Me tôv me za kohol, me kar ishar; awashima wam una kure sha a ve, me tsuwa sanker wam; uwegh agh kua tim ve.

¹⁰U fehe ahumbe Ou, zegemnger cir ve, ve mire er inyelegh shin mngerem ma tamen yô.

¹¹Ka an nan lu er We nahan ken mbaaôndo? Ka an nan lu er We, a icighanmlu u icivirigh man aeren a a kom iwuese a cieryol kua a kpilighyoloo?

¹²U naregh uwegh Ough ku yanegh, inya mena ve.

¹³Sha erdoo Wou, U hemen ior mba U paa ve yô, U hemen ve gbenda sha agee Ou, U za a ve hen icighanjiir Wou.

¹⁴Akuraior ungwa, akarkase nga gbidyen ve iyol; mbamtoghor tser mba ve tem ken Mbafiliti

¹⁵Tsô kondo utor mba Edom iyol; mbatarev mba Moabi kpaa, akarkase gbidye ve iyol; mba ve tem ken Kanaan cii, iyol kpe ve.

¹⁶Iwondo man mciem haa ve iyol; sha mtaver u uwegh Ough, ve huan ving, er iwen yô, shighe u ior Ou lu karen la TERE, shighe u ior mba U yam la ve lu karen yô,

¹⁷Ú nyôr a ve, Ú za môôr ve sha uwo u u lu dyako Wou la, ka ijiir i U gem i, i hingir ijiir You i teman her je la TERE, icighanjiir u ave Ou a ver un yô, TERE.

¹⁸TER Una tema tor gbem sha won je.

¹⁹Gadia anyinya a Farao a akeke na kua mbaanyinyav nav hungwa shin zegemnger cir ve; kpa Mbaiserael yô, per sha tareghnyaagh hen atô u zegemnger.

²⁰Profeti u kwase Miriam, anngô u Aron u kwase, kôr angenga sha uwe; kasev cii due dondo sha a na a anigingav, gba vinen amar.

²¹Miriam kaa a ve er: Ter nen TER icam, gadia A hemba tser tser; nyinya kua orhendan un kpaa, A haa ve shin zegemnger.

²²Tsô Mose mough a Mbaiserael hen Zegemnger u Nyian, ve gba nyôron ken desereti u Shur; ve zende ken desereti ayange atar je, ve zua a mngerem ga.

²³Mba va ar hen Mara yô, ve fatyô u man mngerem ma Mara ga, gadia ma yua; ka nahan man i yilan ijiir la iti er Mara ye.

²⁴Tsô ior gba zan Mose ivever iyol, ve kaa er: Sé ma nyi?

²⁵Nahan a vaa a TER; tsô TER tese un kon ugen, a gbihi u shin mnger, mngerem maa hingir dedoo. A wa ve kwagh heregh, shi A na ve tindi kpaa; ka heregh kpaa, A kar ve ye;

²⁶A kaa er: Aluer ú waan imo i TER, Aôndo wou, iko a ishima i môm man ú eren kwagh u a lu vough sha ishigh Nagh kpaa, shi ú waan iko sha atindi a Na, man ú ver ishima sha akaawan a Na cii yô, angev mbu M ne Mbaigipiti la, môm tsô kpaa, Me na u ga; gadia ka Mo TER u been we angev.

²⁷Tsô ve ar hen Elim, ihwembemnger lu her pue kar ihiar man atine a ivilegh akunduatargber; ve haa afo hen mngerem mara.