Read tiv Ekesodu 21 Bible Online

Ekesodu 21 - tiv bible

Ekesodu 21

¹Ka akaaôron a jirigh a ú ver ve sha ishi ne:

²Aluer ú yam kpan u Heberu yô, nana̱ er tom u kpan anyom ataratar; sha inyom i sha utaankaruhar la yô, nana̱ due ken kpan kera, gbilin.

³Aluer nan va tswen yô, nana̱ due di tswen; aluer nana̱ lu a kwase yô, kwase u nan a̱ due a̱ yem a nan imôngo.

⁴Aluer ter u nan una na nan kwase man nana̱ mar ônov a nan, a lu mba nomso shin mba kasev kpaa, kwase la vea ônov nav vea hingir mba ter u nan la, nana̱ due tswen.

⁵Kpa aluer kpan la nan kaa gbar gbar er: Terem man kwase wam kua mbayev av ve doom ishima, nahan me due ken kpan ga yô;

⁶nahan, ter u nan a̱ za a nan hen Aôndo, a̱ va a nan hen hunda, shin hen kpande u imbusuhunda; ter u nan la, a̱ pev nan togh sha sua, nahan nana eren un tom gbem sha won.

⁷Aluer or nan tee wan u nan u kwase, á za hingir kpankwase yô, una due er ikpan i nomso i dugh nahan ga.

⁸Aluer una kera doo ter na, u a lu veren ishima er ma a lu kwase na la ga yô, a̱ de, i̱ paa un; una fatyô u geman un teen ikurior igen ga, sha ci u a tsugh un a tsugh yô.

⁹Aluer una lu veren ishima er a̱ lu kwase u wan na yô, a̱ er ase a na vough er i eren a ônov mba kasev nahan.

¹⁰Aluer una er ugen kpaa, kwaghyan u ngula man akondo na kua akaa a sha ivôson na, a̱ de panden a ga.

¹¹Aluer una er un akaa atar ne ga yô, a̱ due ken kpan gbilin a̱ yem, i̱ de luun sha inyar ga.

¹²Or u nan gbidi or je nan kpe yô, i̱ wua nan kpee je.

¹³Kpa aluer or nan vande wan ishima nahan ga, kpa a lu Aôndo A ne er kwagh la a er nan nahan yô, Me ver ijiir i nana yevese á za yô.

¹⁴Aluer or nan va sha apera hen or u nan we ndor a nan, nana wua nan sha ayom yô, kar a nan hen atse Am a nanden nagh sha mi kera, sha er nana kpe yô.

¹⁵Or u nan gbidi ter u nan shin ngô u nan yô, i̱ wua nan kpee je.

¹⁶Or u nan ii or, nan za tee, shin i kohol nan a mi ave yô, i̱ wua nan kpee je.

¹⁷Or u nan toho ter u nan shin ngô u nan yô, i̱ wua nan kpee je.

¹⁸Man aluer nomsombaiorov vea lu nôngon num, man ugen a kema ugen iwen, shin una ta nan iju man nana kpe ga, kpa nana lu sha gambe uange yô,

¹⁹aluer nana shi nana mough nana gba zenden sha aga u nan yô, u a gbidi nan la, a war je ve; kpa a̱ kimbi nan shighe u nan u a vihi nan la, shi a̱ sôr nan angev mbu nan, mbu̱ bee.

²⁰Aluer or a gbidye kpan u nan shin kpan u nan u kwase sha gbo, man una gema kpe nan sha ave yô, i̱ or iyev la kpee je.

²¹Kpa aluer una tsa iyange i môm, shin ayange ahar yô, á kera or iyev ga; gadia ka inyaregh ki nan je.

²²Aluer nomsombaiorov vea lu nôngon num man ugen a ta sha kwase uya, je una dugh iyav, kpa kwagh ugen a kera er ga yô, i̱ ya or la zwajirigh kpee je, sha kwagh u nom u kwase la a kaa yô; nana̱ kimbi er mbaajiriv ve rumun la.

²³Kpa aluer ma kwaghbo ugen kposo a er yô, i̱ kimbi uma sha uma,

²⁴ishe sha ishe, inyigh sha inyi, uwegh sha uwe, nguhar sha nguhar,

²⁵usuhian sha usuhian, ivav sha ivav, ibembegh sha ibembe.

²⁶Aluer or á ta kpan u nan u nomso shin u kwase sambe sha ishe, nana vihi i yô, nana̱ dugh un ken kpan kera, sha ci u ishe na la.

²⁷Man aluer nan tsuwa kpan u nan u nomso shin u kwase inyigh kpaa, nana̱ dugh un ken kpan kera, sha ci u inyigh nagh kila.

²⁸Aluer bua una kôr nomsoor shin kwase, vea kpe yô, i̱ wua bua la sha awen kpee je, i̱ de ye inyam na ga; kpa or u bua la yô, i̱ de nan.

²⁹Kpa aluer kera je, bua la una kôron, man i kaa or u a lu u nan la, kpa nana kura un ga, zan zan una va wua nomsoor shin kwase yô, i̱ wua bua la sha awen kpee je, or u a lu u nan la kpaa, i̱ wua nan.

³⁰Man aluer á wa nan ipaa yô, nana̱ na ipaa sha u paan uma u nan, sha hanma kwagh u i we nan la cii.

³¹Shin a lu wan u nomso una kôr, shin a lu u kwase kpaa, kape á kure ijir i nan ne.

³²Aluer bua la una kôr kpan u nomso shin kpan u kwase yô, nana̱ kimbi ter la ushekel mba azurfa ikundugber, man shi i̱ wua bua la sha awen.

³³Aluer or nana bugh ijôr, shin nana̱ time ijôr man nana wuhe i hunda ga, man bua shin jaki a va gba shimi yô,

³⁴or u ijôr la, nana̱ kimbi, nana̱ na or la inyaregh, kpa gundu la yô, a̱ hingir u nan.

³⁵Aluer bua u or una kôr bua u orgen, je una wua un yô, ve̱ tee bua u uma la, ve̱ kar inyaregh nagh, gundu la kpaa ve̱ kar.

³⁶Man aluer kera je kpa i vande fan er bua la a ker man or u bua la a kura un ga yô, nana̱ kimbi vough, bua sha bua, gundu la a̱ hingir u nan.