Read tiv Ekesodu 22 Bible Online

Ekesodu 22 - tiv bible

Ekesodu 22

¹Aluer or ii bua shin iyôngo nana sôngo, shin nana tee yô, nana̱ kimbi ibua itian sha bua u môm la, man iyôngo inyiin sha iyôngo i môm la.

²Aluer á kôr ormbaiv iin ave je, man á gbidye nan, nana kpe yô, ibo ia lu sha awambe a nan la ga,

³kpa aluer iyange ia due nan a mi yô, ibo ia lu sha awambe a nan. Nana̱ kimbi kpee; aluer nan ngu a kwagh ga yô, i̱ tee nan sha ci u iv mbu nan.

⁴Man aluer á kohol nan a kwagh u nan ii la ave, uma yô, á lu bua, shin jaki, shin iyôngo yô, nana̱ kimbi kwa har.

⁵Aluer or nana pase ilev mbi nan er mbi̱ ya ikôngough ki nan shin sule u nan u wain man mbia za ya kwagh ken ikôngough ki orgen yô, nana̱ kimbi sha vegher-ikôngo u nan u hemban doon man veghersule u wain u nan u hemban doon kpaa.

⁶Aluer usu ua gba, ua hia usaa man aile a uyia, shin alakema u shisha; shin ikôngough kia hia yô; u nan nande usu la nana̱ kimbi kpee je.

⁷Aluer or á na orgen inyaregh shin akaa agen er nan koso man i va ii a hen ya u or la yô, a̱ zua a ormbaiv la yô, nana̱ kimbi kwa har.

⁸Man aluer á zua a ormbaiv la ga yô, orya la nana̱ za hen Aôndo, nana̱ za bum er nan bende uwegh sha inyaregh ki or la ga yô.

⁹Hanma kwagh u a nzughul, shin a lu kwagh u bua, shin jaki, shin iyôngo, shin ikondo, shin hanma kwagh u a saa, man orgen nan kaa er: Ka un je ne yô; ve uhar cii, i̱ za a kwagh ve sha ishigh ki Aôndo; or u Aôndo A ne nan ibo yô, nana̱ kimbi ugen la kwa har.

¹⁰Aluer or á na orgen jaki, shin bua, shin iyôngo, shin hanma ilegh er nan nengen sha min, man aluer ki kpe shin kia gba angev, shin a kor ki, or á nenge ga yô,

¹¹mbum u TER una kure ve kwagh la, shin nan bende uwegh sha kwagh u or la, shin nan bende ga yô; or u i lu kwagh u nan la kpaa i̱ kuma nan, nahan ugen la nana kimbi ga.

¹²Kpa aluer a ii a ii kwagh la hen a nan je yô, nana̱ kimbi or u kwagh la.

¹³Man aluer á ande un a ande yô, nana̱ va a mi sha ci u shiada; kwagh u i ande la yô, nana kimbi ga.

¹⁴Aluer or á goho kwagh hen or man kwagh la za vihi iyol, shin una kpe, man or u kwagh la una lu heregh a na ga yô, nana̱ kimbi kpee je.

¹⁵Kpa aluer or u kwagh la una lu heregh a na imôngo yô, nana̱ kimbi ga; aluer i vande ôron veren sha inyar yô, i̱ kure sha ki.

¹⁶Aluer or á mee iniunkwase i i lu a vande tôndon zwa u nan or ga, nana̱ yav a mi yô, nana̱ kem i kpee, i̱ hingir kwase u nan.

¹⁷Aluer ter na una venda gbang gbang u nan nan i yô, nana̱ na inyaregh vough er i kemen anuunaukase nahan.

¹⁸De kera deen kwase u eren ahir a̱ luun uma ga.

¹⁹Or u nan yav a zendenya yô, i̱ wua nan kpee.

²⁰Or u nan ne ma aôndo ugen nagh ku sôngon i lu TER tseegh ga yô, i̱ tim nan kera purututu.

²¹De eren a shiror dang ga, shi de eren nan ican kpaa ga; gadia ne kpaa, ngise ne lu shir ken tar u Igipiti.

²²De eren ma kwasecôghol ican ga, shin ancôghol kpaa ga.

²³Aluer ú er ve ma ican man vea gema vea vaa a Mo yô, Me ungwa mliam vem kpee je;

²⁴ishima i vihin Yam ia yegh a yegh, Me wua ne sha sanker; kasev enev vea hingir kasev mba côgholov, ônov enev kpaa vea hingir ancôgholov.

²⁵Aluer wea pwar inyaregh wea na icanor u ken ior Av, u nan lu a we imôngo yô, de eren a nan er or u cirin or injô nahan ga, shi de kera we nan mngerem kpaa ga.

²⁶Aluer wea ngohol orgen riga sha ityungu yô, hide nan a mi je er iyange i lu a mire ga yô;

²⁷gadia ka un tseegh a lu kwagh na u cirin ye, ka ikondo i cirin kwavyolough na je la. Ka nyi una yav a mini? Nahan yô, zum u una vaa a Mo yô, Me ungwa; gadia M ngu a mhôônom ma zungwen.

²⁸De toho Aôndo ga, shi de tem kwaghbo sha ortaregh u nongo wou kpaa ga.

²⁹De ngôôr u nan nagh ku iyiav youv mbi ken sule wou ga, kua wain wou kpaa ga. Waniunda u ken ônov ou mba nomso ú naan Mo.

³⁰Kape ú er a abua ou kua iyôngo you kpaa la; ayange ataankarahar a̱ lu a ngô na, sha iyange i sha anigheni la yô, ú nam un.

³¹Lum nen uicighanmbaiorov; nahan yô, de ye nen ma inyam i inyamikume i woo i ken toho ga; gbihi nen iwa i.