Read tiv Ekesodu 36 Bible Online

Ekesodu 36 - tiv bible

Ekesodu 36

¹Besalel man Oholiabi ve er tom kua hanma or u fan eev, u TER A we mfe man mkav ken a nan sha u fan u eren hanma tom u icighanjiir, er TER A kaa nahan cii.

²Tsô Mose yila Besalel man Oholiabi kua hanma or u fan eev, u TER A ne kwaghfan ken ishima i nan, ka hanmô cii, u ishima i mgbegh nan u zan hen tom la, u za eren u yô.

³Ve gema ve ngohol nagh ku Mbaiserael va a mi sha u eren tom u icighanjiir a mi la cii, hen Mose. Hanma sev ve zer van a nagh sha ishima i dedoo.

⁴Tsô mbafankwagh cii, mba ve eren tom u icighanjiir la cii, hanmô ve mough hen tom u nan lu eren yô,

⁵ve va ôr kwagh a Mose, ve kaa er: Ior mba van a akaa ka ganden tom u TER A kaa er i̱ er u la yô.

⁶Tsô Mose kaa, maa i yôô hen afo cii, er: Nomsoor shin kwase kpaa, ve̱ de kera seer u eren ma tom sha ci u nagh ku icighanjiir la ga. Nahan i yange ior u van a mi.

⁷Gadia ikav mbi ve lu a mi yô, kuma u eren tom la a mi cii, gande a gande je.

⁸Nahan mbafaneev cii mba ken mbaerentom la, ve er tabernakel la sha akondo a yisan pue; sha ikondo i pupuu i kôngor i sha mou u sendan man ikondo i kwel man i nyian dindee man i nyian bong a ucerubi sha mi, lu tom u orfaneev je.

⁹Iniembe i hanma ikondo i yisan lu aseva ikundu kar anigheni man igbanger i hanma ikondo i yisan lu aseva anyiin; akondo a yisan la cii, a lu vough vough.

¹⁰A zua akondo a yisan a ataan la a kor, shi agen a ataan kpaa a zua a, a kor.

¹¹Shi a er ahura a wever a kwel sha kur u ikondo i ken kpe, i ikondo i yisan i i zough i la; kape shi a er sha kur u ikondo i ken kpe, i kondo i yisan i sha uhar i i zough a zua i la kpaa.

¹²A er ahura a wever akunduahargber sha ikondo i yisan i môm la shi a er ahura a wever akunduahargber sha kur u ikondo i yisan i sha uhar i i zough i la; ahura a wever la cii, lu sha akar akar.

¹³A er uiwever mba zenaria akunduahargber; a zua akondo a yisan la sha uiwever mbala; nahan tabernakel la hingir môm.

¹⁴A shi a tume akondo a yisan sha aive a ivo er a̱ lu tenti u cirin tabernakel a mi; a tume akondo a yisan pue kar môm.

¹⁵Iniembe i hanma ikondo i yisan lu aseva ikundugber, igbanger i hanma ikondo i yisan lu aseva anyiin; akondo a yisan a pue kar môm la cii, a lu vough vough.

¹⁶A zua akondo a yisan a ataan kposo, akondo a yisan agen a ataratar di kposo.

¹⁷A er ahura a wever akunduahargber sha kur u ikondo i ken kpe, i ikondo i yisan i i zough i la, shi a er ahura a wever akunduahargber sha kur u ikondo i yisan i sha uhar i i zough a zua i la kpaa.

¹⁸A er uiwever mba togula akunduahargber sha u zuan tenti er una lu môm yô.

¹⁹A er kwagh u cirin tenti a mi sha akôv a anomaiyôngo a i nyian a yô, man kwagh u cirin mi u a mase sha la sha akôv a ayu.

²⁰Shi a gba mtôm ma ipeem ma tabernakel sha ikon i saa.

²¹Ityaven i ityôgh lu aseva pue, igbanger i hanma ityôgh lu ishiva i môm cir tiôn.

²²Hanma ityôgh lu a azongo ahar a i zough a zua a yô, kape a er mtôm ma tabernakel cii la.

²³Man a gba mtôm ma ipeem mara sha ci u tabernakel; mtôm ikundu sha ci u vegher u imbusutariyan ken ian i imbusutariyan la;

²⁴man a er agbur a azurfa ahar shin atô a mtôm ma ikundum mara, agbur ahar shin ityô i môm, sha ci u azongo a ki ahar la, man agbur ahar shin ityôgh kigenegh, sha ci u azongo a ki ahar la.

²⁵A gba mtôm ma ipeem ikundu sha ci u vegher u tabernakel ugen u ken imbusutarimese la,

²⁶man agbur a azurfa a ma, akunduahar, agbur ahar shin ityô i môm, man agbur ahar shin ityôgh kigenegh.

²⁷A gba mtôm ma ipeem mtaratar sha ci u ijime i tabernakel, vegher u shin ityôtar la.

²⁸Man a gba mtôm mhar sha ci u azongo a tabernakel a ken ijime la;

²⁹i zua ma mhar ken akur (ma guvur) ma lu kwagh môm vegher u shin kua vegher u sha kpaa zan zan ar sha ihye la; kape a er ma mhar cii ken azongo ahar la.

³⁰Mtôm ma ipeem lu mnigheni a agbur a azurfa a ma, agbur pue kar ataratar, agbur ahar shin hanma ityô.

³¹A er itiran i sha kon u saa, itian sha ci u mtôm ma imbusu i tabernakel i môm,

³²man itiran itian sha ci u mtôm ma imbusu i tabernakel igen la, man shi itiran itian sha ci u mtôm ma shin ijime i tabernakel vegher u shin ityôtar la.

³³Shi a er teran u hen atô, u u tera hen atô u mtôm ma ipeem hii hen kpe ungun zan zan ar ken kpe ungula.

³⁴A cir mtôm mara zenaria iyol, shi a er ma ahye a zenaria, hingir ajiir a itiran, itiran la kpaa, a cir i zenaria iyol.

³⁵Shi a er ikondo i yisan i kwel man i nyian dindee man i nyian bong man ikondo i pupuu i kôngor i sha mou u sendan a ucerubi sha mi; lu tom u orfaneev je.

³⁶A er mtôm mnyiin sha kon u saa sha ci u i, a cir ma zenaria iyol; uiwever mba ma kpaa, lu mba zenaria; a haa ma agbur a azurfa anyiin.

³⁷Shi a er ikondo i yisan hunda u tenti, i kwel man i nyian dindee man i nyian bong man ikondo i pupuu i kôngor i sha mou u sendan, lu tom u orfan ikondo i tumen sha hwe;

³⁸man mtôm ma i mtaan a uiwever mba ma; a cir ityouv mbi ma man ahye a ma zenaria iyol; agbur a ma ataan lu a togula.