Read tiv Ekesodu 40 Bible Online

Ekesodu 40 - tiv bible

Ekesodu 40

¹Tsô TER shi ôr kwagh a Mose kaa er:

²Sha iyange i hiihii i uwer u hiihii la ú tim tabernakel u tenti u kohol ker la.

³Ver areki u shiada ker, yisa areki la sha ikondo i yisan la.

⁴Nyôr a tebul, sôr akaa a a lu sha mi yô, man shi nyôr a daarimenger kpaa man tsar amenger a na la.

⁵Ver atse a zenaria a nanden kwaghhumandoon sha mi la, sha ishigh ki areki u shiada, har kwaghyisan sha hunda u tabernakel la.

⁶Ver atse a nanden nagh sha hunda u tabernakel u tenti u kohol ker la.

⁷Ver tasa hen harga u tenti u kohol ker la a atse la; haa mngerem shimi.

⁸Kase tembe kwa, ningir tser, har kwaghyisan u hunda u tembe la.

⁹Tôô mkurem ma shighen, shighe tabernakel kua akaa a a lu kimi cii, tsegha un a ikav nav cii; nahan una lu icighankwagh je.

¹⁰Shighe atse a nanden nagh la mkurem a ikav mbi a cii, tsegha atse la; nahan atse aa lu icighankwagh u hemban cii je.

¹¹Shighe tasa la mkurem kua ityô na kpaa, tsegha un.

¹²Va a Aron kua ônov nav hen hunda u tenti u kohol ker la, ôô ve iyol sha mnger.

¹³Haa Aron uicighanmbaakondov, shighe un mkurem, tsegha un, a̱ eren Mo tom u pristi.

¹⁴Va a ônov nav, haa ve uriga;

¹⁵shighe ve mkurem er u shigh ter ve nahan, ve̱ eren Mo tom u pristi; mshigh ve la maa una na, vea lu upristi gbem sha ikov ikov.

¹⁶Kape Mose er la; er TER kaa un nahan, kape a er vough je la.

¹⁷Tsô sha inyom i sha uhar, uwer u hiihii, sha iyange i hiihii la, i tim tabernakel.

¹⁸Tsô Mose tim tabernakel, a ver agbur a na, a tim mtôm nam ma ipeem, a tera itiran na, shi a tim mtôm nam kpaa.

¹⁹A samber tenti sha tabernakel la, a gema kwagh u cirin sha tenti la kpaa, a cir sha mi; er TER kaa Mose nahan.

²⁰A tôô Shiada la, a wa ken areki, a shindi igbough mbila sha areki, a ver ijiir i nan iwom her la, sha areki;

²¹a nyôr a areki la ken tabernakel; a har ikondo i yisan, a yisa areki u shiada; er TER kaa Mose nahan.

²²Man a ver tebul ken tenti u kohol ker la, vegher u tabernakel u ken imbusutarimese, ken won u ikondo i yisan la.

²³A ver ubredi sha mi sha inja sha inja, sha ishigh ki TER, er TER kaa Mose nahan.

²⁴A ver daarimenger ken tenti u kohol ker la, sha ishigh ki tebul, vegher u tabernakel u ken imbusutariyan la.

²⁵A ver amenger sha mi, sha ishigh ki TER, er TER kaa Mose nahan.

²⁶A ver atse a zenaria la ken tenti u kohol ker la, sha ishigh ki ikondo i yisan la,

²⁷shi a nande kwaghhumandoon sha ilyôghonov mbi dedoo sha mi; er TER kaa Mose nahan.

²⁸Man a har kwaghyisan u sha hunda u tabernakel la.

²⁹A ver atse a nanden nagh sha hunda u tabernakel u tenti u kohol ker la, a na nagh ku nanden kua nagh ku sha samuyia sha mi; er TER kaa Mose nahan.

³⁰Shi a ver tasa hen harga u tenti u kohol ker a atse la, a haa mngerem ma ôôn iyol shimi.

³¹Mose vea Aron kua ônov nav kpaa, ve ôôn ave kua angahar sha ma;

³²zum u vea nyôron ken tenti u kohol ker man vea kporom hen atse kpaa ve vande ôôn; er TER kaa Mose nahan.

³³A kase kwa u tembe, a wa tabernakel kua atse atô; a har kwaghyisan u sha hunda u kungur. Kape Mose kure tom la la.

³⁴Tsô ibeenegh va cir tenti u kohol ker la; iengem i TER kpaa iv ken tabernakel.

³⁵Mose fatyô u nyôron ken tenti u kohol ker la ga, sha ci u ibeenegh lu sha mi, iengem i TER kpaa iv ken tabernakel yô.

³⁶Zum u ibeenegh kia moughon sha tabernakel kera yô, Mbaiserael ve mough ve gba yemen ken hemen, kape ve lu haan zan la.

³⁷Kpa ibeenegh kia lu a mough ga yô, ve kpaa ve mough ga, saa iyange i kia mough la.

³⁸Gadia ibeenegh ki TER ki lu sha tabernakel la atetan, tugh yô, usu u lu ker, sha ashe a ya u Iserael cii, sha zende ve cii.