Read tiv Ekesodu 9 Bible Online

Ekesodu 9 - tiv bible

Ekesodu 9

¹Tsô TER kaa a Mose er: Za hen Farao, za kaa un wer: TER, Aôndo u Mbaheberu kaa nahan er: De ior Av ve̱ yem, ve̱ za civir Mo.

²Gadia aluer ú venda u nan ve gbenda, ú kôr ve her zan zan yô,

³nenge, uwegh ku TER kua lu sha uzendenya ou mba ken akôngo, sha anyinya man ujaki man urakumi man abua kua iyôngo kpaa; angev mbu anule mbu bov mbua kôr ve.

⁴TER Una pav uzendenya mba Mbaiserael kposo a uzendenya mba Mbaigipiti; mba ken Mbaiserael cii yô, môm môm una kpe ga.

⁵Tsô TER ver shighe, A kaa er: Kper je, TER Una er kwagh ne ken tar ne.

⁶Kper nan yô, TER er kwagh la, uzendenya mba Mbaigipiti cii kpe, kpa uzendenya mba Mbaiserael yô, môm tsô kpaa kpe ga.

⁷Farao tindi, yô, nenge uzendenya mba Mbaiserael, môm tsô kpaa, kpe ker ga. Nahan kpaa, ishima i Farao cighir her, a de ior er ve̱ yem ga.

⁸Tsô TER shi kaa a Mose vea Aron er: Kese mtwem ma ken atse sha ave poo; yô, Mose a̱ tsenda ma sha, sha ashe a Farao.

⁹Maa hingir ihundu i vian ken tar u Igipiti cii, maa haa or kua zendenya atundu a hughum ken tar u Igipiti cii.

¹⁰Tsô ve kese mtwem ma ken atse, ve za tile sha ishigh ki Farao; Mose tsenda ma sha; tsô atundu a hughum haa ior iyol kua uzendenya kpaa.

¹¹Mbaahiriv kera fatyô u tilen sha ishigh ki Mose ga sha ci u atundu la; gadia atundu mura mbaahiriv kpaa, kua Mbaigipiti cii.

¹²Kpa TER cighir Farao ishima, a wa ve iko ga; er TER kaa Mose yô.

¹³TER shi kaa a Mose er: Mough pepe, za tile sha ishigh ki Farao, kaa a na wer: TER Aôndo u Mbaheberu ngu kaan nahan er: De ior Av ve̱ yem ve̱ za civir Mo.

¹⁴Gadia hen shighe ne Me haa atsan a Am cii ken ishima you man sha mbatomov ou kua ior ou kpaa, sha er u̱ fa er ma or môm nan lu er Mo sha won ga yô.

¹⁵Gayô, hegen ma M naregh uwegh Agh ma M hee u kua ior ou cii bouange, ma M tim u sha won kera kpaa.

¹⁶Kwagh u M de u u lu her je yô, ka sha u Me tese u agee Am man á pase iti Yam sha won cii kpaa yô.

¹⁷U ngu di kenden iyol you sha her, yangen ior Av wer ve̱ de yemen ga tsô hô?

¹⁸Nenge, kper er shighe ne nahan Me nôô ura u awomboogh baveraa, imba i Igipiti gba je zan zan nyian i lu a nôô her ga yô.

¹⁹Yô, tindi, i̱ kumba uzendenya ou cii, ve̱ nyôr, kua hanma kwagh u u lu a mi ken akôngo cii; gadia ior cii man uzendenya cii, mba á kohol ve ken won i lu a nyôr a mi ken ya ga yô, awombo aa ta ve vea kpe.

²⁰Hanma ortom u Farao u nan cie imo i TER yô, nan er mbatomov mba nan ve̱ yevese ve̱ za nyôr ken uya, ilev mbi nan kpaa.

²¹Kpa u nan we imo i TER iko ga yô, nan de mbatomov mba nan man ilev mbi nan ve̱ gba lun ken akôngo tsô.

²²TER kaa a Mose er: Naregh uwegh ough Sha, sha er ura u awomboogh u̱ nôô ken tar u Igipiti cii, sha ior man ilev kua hanma imendenegh ki ken akôngo, ken tar u Igipiti.

²³Tsô Mose kende gbough nagh sha; nahan TER dura haa awombo, usu kpaa due sen shin inya; TER nôô ura u awomboogh ken tar u Igipiti.

²⁴Ura u awomboogh nôô je, usu nungwa sha awombo, taver kpishi, imba i i lu a vande nôôn ken tar u Igipiti er u hingir ikurior la ga.

²⁵Awombo haa ken tar u Igipiti cii, ta hanma kwagh u ken akôngo, ior kua uzendenya kpaa; awombo ta hanma imendenegh ki ken akôngo, shi sombo hanma kon u ken akôngo kpaa.

²⁶Saa ken tar u Goshen tseegh, u Mbaiserael lu ker la, awombo haa ga ye.

²⁷Tsô Farao tindi, i yila Mose vea Aron, a kaa a ve er: Hen shighe ne yô, m er kwaghbo; ka TER A lu a ishô ye, mo kua ior av se mba a ibo.

²⁸Sôn nen TER, gadia mbamdor mba Aôndo kua awombo ne gande; me na ne gbenda, kera ngôôr yen je ga.

²⁹Mose kaa a na er: Me due a due ken akôngo a gar tsô me kende ave am sha TER; mbamdor vea huan, awombo kpaa aa kera haa ga, sha er u̱ fa er tar u lu u TER yô.

³⁰Kpa we kua mbatomov ou yô, m fa ne cia TER Aôndo ve ga.

³¹(I vihi ada man shair, gadia shair wa asange, man ada yô, lu kparen a kpar,

³²kpa alakema man agase yô, i vihi ve ga, gadia ve lu a kuma ga.)

³³Tsô Mose mough hen Farao due ken akôngo a gar, a kende ave na sha, sha TER; nahan mbamdor kua awombo de, ura kpaa kera nôô shin inya ga.

³⁴Zum u Farao nenge er ura u tende, awombo kua mbamdor kpaa ve de yô, a shi a seer isholibo, a cighir ishima na, un kua mbatomov nav kpaa.

³⁵Ishima i Farao cighir, a de Mbaiserael er ve̱ yem ga; er TER kaa sha uwegh ku Mose yô.