Read tiv Yobu 10 Bible Online

Yobu 10 - tiv bible

Yobu 10

¹M vôr a uma wam cii; me pase kwagh u a tserem yô, me yer ga; me ôr kwagh sha ishimavihin yam i tsung la.

²Me kaa a Aôndo mer: De nem ibo ga, kpa tesem kwagh u a er man U lu num a mo la.

³Doo u We Ú kighir or a icana, Ú laha tom u ave Ou, man Ú geman Ú wanger mhen u mbaafereve?

⁴Ashe Ou ka a iyolougho, mnenge Wou kpaa ka mnenge u oro?

⁵Ayange a Ou nga er ayange a oro, shin anyom a Ou kpaa nga er ayange a or nahana,

⁶er U tevem sha ibo yam, U ker kwaghbo wam,

⁷shin er U fe er m lu a ibo ga nahan kpaa, man er ma or u nana fatyô u yiman or sha ikev You kpaa nan lu ga?

⁸Ave Ou erem, a maghem kpaa, a zuam cii doo doo; nahan kpaa, Ú gema Ú timin keraa?

⁹Yô, shi umbur er U erem er inyatyuu nahan yô; nahan Ú shi Ú gemam M̱ hingir vuulevu zee?

¹⁰U haam er atumbabua, man U tam ijen er atumbabua a kôrough nahan gaa?

¹¹U cirim inyam iyol kua kwavyolough kpaa; U korom, U zuam sha ikuhe kua igbila.

¹²U nam uma, shi U er a mo dedoo, iko i U wem ne, i kura jijingi wam.

¹³Nahan kpaa U hen akaa ne ken ishima You; m fa er kwagh ne a lu U ken ishima yô.

¹⁴Aluer mea er kwaghbo yô, ma U verem ikav, ma U nem ishô sha ifer yam ga.

¹⁵Aluer mea lu a ibo yô, kwagh una tserem; shin mea lu or u jighilii kpaa, me kende ityough sha ga; kunya ua ivim iyol je gande, man me lu nengen ican yam kpaa.

¹⁶Shin ityough yagh kia kende sha kpaa, Ú tôvom er begha a tev kwagh nahan; shi Ú er a mo á kpiligh iyol je.

¹⁷Ú va a mbashiada mba hev sha a mo, man Ú seer ishimanyoon You a mo; akumautya kposo kposo nga van ityav sha a mo.

¹⁸Ka nyi je man U due a mo ken uya? Guda ma m kpe, ma ishe kpaa, ma i nenge a mo ga.

¹⁹Ma m hingir er lu i jilem ga yô; ma i dughum ken uya, ma i ze a mo shin uwar.

²⁰Ayange am nga kpeghee tsô ga? Tile nahan, shi dem, i̱ pever mo iyol kpeghee,

²¹er m lu a za henpe me kera hide ga la yô, ka hen tar u imegh man mure u kuugh je la;

²²tar u imegh mgbigh mgbigh, er angôghime nahan; tar u mure u kuugh, u lun nzughul nzughul; iwanger i u ngi er angôghime nahan.