Read tiv Yobu 20 Bible Online

Yobu 20 - tiv bible

Yobu 20

¹Tsô Sofar Ornaamati, gema kaa er:

²Ka sha ci u nahan je man mbamhen av ka ve vam a mrumun ye, sha ci u tolough mo ken ishima.

³M ongo mzehe u a nem kunya la, kpa ka jijingi u a dugh sha mkav wam a nem imo ye.

⁴U kera fa kwagh ne hii ngise je, hii shighe u i ver or shin tar la je gaa?

⁵er m-erikenge u iferor a lu tiônôô, man iember i ormimiga kpaa i lu kpeghee tsô.

⁶Shin icivir i nan kôndo ar Sha, ityough ki nan kpaa ki tagher sha abeen,

⁷nahan kpaa nana saa ishe er akôngo a nan ze yô; mba ve vande nengen a nan, vea pine er: Nan ngu hana?

⁸Nana purugh kera er mnyam ma cien nahan, á kera zua a nan ga; een, á zenda nan kera er kwagh u i nenge a mi ken mnya tugh yô.

⁹Ishe i i vande nengen a nan kpaa ia kera nenge a nan ga; man ijiir i nan kpaa ia kera nenge a nan ga.

¹⁰Ônov mba nan vea ker iwasen hen mbaatsanev, ave a nan kpaa aa shi á hide a inyaregh ki nan;

¹¹akuhe a nan iv a agee a iyev mbu nan, kpa mbu yav a nan imôngo shin vuulevu.

¹²Shin er ifer nyoho nan ken zwa, shin nan yer i shin nombor u nan,

¹³shin nan kôr i, nan rumun er i̱ yem ga, zwa u nan kpaa u koso i, i̱ lu her,

¹⁴nahan kpaa, kwaghyan u nan u ken uya, una gema una hingir mlem ma igbinde ken iyav mbu nan.

¹⁵Nan mena inyaregh kpa shi nan sua ki kera; Aôndo Una dugh ki ken iyav mbu nan kera.

¹⁶Nana ma megh ku gbinde; nombor u iyô ua wua nan.

¹⁷Nana nenge a uifi ga, uikuwan mba zar u iyoughough kua atumbabua a kôrough la.

¹⁸Kwagh u nan zough a mi sha tom u ican la, nana hide a min — nana mena un ga — nana zua a iember sha min ga, mtsera u nan zough a min sha kasua la kpaa.

¹⁹Gadia nan er mbaatsanev ican, nan ta ve kera, ya u nan ngohol sha agee la kpaa, nana maa un ga.

²⁰Gadia nan fe mmem ken a nan ga, nana yem a akaa a a doo nan la ga.

²¹Ma kwagh shi her u nan ye ga ze, ka nahan man mkpeyol u nan una tsa ga ye.

²²Er akaa a nan a dumbur nahan kpaa, nana ya ican; uwegh ku hanma or u nan lu ken ican ku sha a nan.

²³Sha u ivin iyav mbu nan yô, Aôndo Una haa nan iyugh Na i vihin, Una nôô i sha a nan, ia hingir kwaghyan u nan.

²⁴Nana nyôngoso ikav mbi tswamev mbi iyôôv, ada u togula una pev nan á due kera;

²⁵nan tsuwa i, ken ijime i nan kera; zwaivaan u engem u due nan ken mle; mciem ta nan iyol.

²⁶I ver angôghime sha ci u inyaregh ki nan; usu u i keer u a keer ga, ua hia nan; ua hia kwagh u a shi ken tenti u nan la kera.

²⁷Sha ngu pasen kwaghbo u nan, tar kpaa mough num a nan.

²⁸Akaa a ken ya u nan á kura a kera, á kar a mi kera sha iyange i iyugh Na.

²⁹Ka kwar u iferor sha uwegh ku Aôndo je ne, kua dyako u Aôndo A ver nan yô.