Read tiv Yobu 21 Bible Online

Yobu 21 - tiv bible

Yobu 21

¹Tsô Yobu gema kaa er:

²Ver nen ato ungwa nen kwaghôron wam doo doo; a̱ gema a̱ hingir ne kwagh u surunshima.

³Nam ian, mo kpaa, m̱ ôr kwagh; me ôr kwagh wam, tsô ú mase nahan taraha.

⁴Mo yô, ijir i m yer yô, ka sha kwagh u oro? Á er nan man me yina ishima ga?

⁵Kenger mo, i̱ kpiligh ne iyol, wa uwegh zwa.

⁶Ka mea hen sha mi yô, ishima i nyian mo, i cier mo iyol.

⁷Ka nyi je mbaaferev ve lu uma, ve hingir mbabeenyol; een, ve seer a seer agee kpaa nahana?

⁸Tsombor ve ngu a ve imôngo je, ônov vev kpaa mba sha ashe ve je.

⁹Uya vev mba bem bem, kwagh u tan mciem iyol ngu her ga, akpa u Aôndo u tsahan a mi kpaa ngu sha a ve ga.

¹⁰Nombua ve ka a unde a yina ga; ngôbua ve ka a mar a dugh iyav ga.

¹¹Ka ve tindi mbayev vev ve zenden er ka ikumuile yô, ônov vev kpaa ve tsuwen ve ember.

¹²Ve wan imo sha angenga man molo, ve ember sha imo i imar i tôngon.

¹³Kpe ve iyol sha ayange a ve cii; fese je ve sen shin Sheol.

¹⁴Nahan kpaa, ve kaa a Aôndo er: Kar hen a vese kera, gadia sar se u fan igbenda You ga.

¹⁵Uhembanagee la ngu nyi je, u sé civir Unu? Man ka nyi mtsera sé zua a mi aluer se sônon Un yôô?

¹⁶Nenge, mkpeyol ve la, ka sha ikev ve a lu ga; mhen u mbaaferev gba ca a mo.

¹⁷Ka acin a me je ka i pir imenger i mbaaferev, man mtim ve kpaa a tser ve, man shi Aôndo a ne ve akaavihin sha iyugh Naa?

¹⁸Man ve hingir er atôayia sha ahumbe, man er akoo a ahumbe a taver a purugh a mi kera nahana?

¹⁹Aôndo ka A ver ifer i nan, i̱ lu her, sha ci ônov mba nan; guda ma A kimbi nan iyol i nan, er nana kav yô.

²⁰Guda ashe a nan iyol i nan ma a nenge a mtim u nan, man nan iyol i nan nana ma iyugh i Uhembanagee la.

²¹Gadia ka nyi shi i gbe nan a ya u nan ken ijime i nan, zum u i tôndo iyenge i iwer i nan kera laa?

²²Ma or ngu u nan tese Aôndo kwaghfan je kpa, Un u A er mba ve tem Sha ijir laa?

²³Orgen ka nan kpe a agee a nan iyol taveraa, kwagh nyian nan ishima ga, kwagh za nan iyol kpaa ga,

²⁴iyol i nan wa ahôm, mshiam ma akuhe a nan ma ndôhôr shou shou.

²⁵Orgen di ka nan kpe a mvihi u ken ishima i nan, nan vande benden kwaghdoon zwa ga.

²⁶Ve cii ka ve yav shin vuulevu imôngo, azôô a cir ve iyol.

²⁷Nenge, m fa mhen wen, kua zwazuan u ne zough sha a mo sha mhen u bo.

²⁸Gadia ne kaa ner: Ya u ipilator ngu hana, man tenti u mbaaferev ve tem her la ngu hana?

²⁹Ne pine mbazenden sha gbenda la gaa? Ne fatyô u nyiman ushiada vev ga,

³⁰er ka i yima iferor sha iyange i bo la, man shi ka i war nan sha iyange i iyugh la.

³¹Ka an nan na nan ibo sha inja i nan la, sha ishigh ki nana? Man ka an nan or nan iyev sha kwagh u nan ere?

³²Ka i tôô nan i za a nan shin uwar, shi i kuran uwar u nan u lu her doo doo.

³³Akpoghol a inyaagh a shin pev doo nan, ior cii kpaa mba dondon nan ijime, mba ve vande a nan kpaa ve ngee iyenge gande u ôron.

³⁴Né er nan man né surun mo ishima sha gbenda u gbilinigh nahana? Kwaghôron wen u ne ve a mi, ka icugh tseegh i mase lun sha mi ye!