Read tiv Yobu 24 Bible Online

Yobu 24 - tiv bible

Yobu 24

¹Ka nyi Uhembanagee A ver ashighe ga, man mba ve fe Un kpaa, ve nengen ayange a jirigh a Na ga?

²Mba ve kper a akav a ipaventar, mba; ka ve ngohol akumaiyôngo sha apera, ve gba koson a.

³Ka ve zenda jaki i ancôgholov, ve ngohol kwasecôghol bua ityungu.

⁴Ve mgbegha mbaibanave sha gbenda kera; atsanaior a shin tar kohol imôngo yer kera.

⁵Nenge, bee ujaki mba ken toho ken desereti nahan, kape ka ve yar tom ve la, ve keren kwaghyan; taaikôngo ka a na ve kwaghyan sha ci u ônov vev.

⁶Ka ve sunda kwaghyan ve ken toho; ve yar twar sha ikon i wain i mbaaferev.

⁷Ka ve yav tugh idyelegh a ikondo ga, mba a kwagh u cirin wuhe mi ga.

⁸Iyol heen ve sha ura u sha iwo, ve lian ken vande sha mban u ijiir yeren.

⁹Mba ve tsough wanikundan u icôghol ityumba zwa, mba; man ve ngohol kwagh u mbaatsanev ve lu a mi iyol la, ityungu.

¹⁰Ve zenden idyelegh, mba a ikondo iyol ga, man ve tôôn aile a uwua ijen;

¹¹ve kaan mkurem ken atô gar u ior mban, ve shoghol wain shin ahungwa a shoghol wain ker la, kpa imura lu kôron ve.

¹²Ken gar yô, mtoghor u ior dugh ker, man uma u mba i gber ve avav la ngu vaan; kpa Aôndo ngu wan msen la iko ga.

¹³Mban yô, mba ken nongo u mbavendan iwanger; ve fa igbenda i i ga, mba tem ken igbenda i i kpaa ga.

¹⁴Orwuanor ka nan mough sha use, nan za wua icanor kua oribanave; tugh yô, ka nan hingir er ormbaiv nahan.

¹⁵Ishe i idyaor ka i keghen aôndoaimegh, nan kaan er: Ma ishe ia nenge a mo ga; nan cir ishigh ki nan kpaa.

¹⁶Ken ime ve pev ayou; atetan ve yer ayol a ve, ve fa iwanger ga.

¹⁷Gadia ve cii, angôghime ngu ve er sev nahan; gadia ve fa mcieryol u angôghime dedoo.

¹⁸Ka ve kar kera fefa sha kwavmnger; i wa tar u ve ya dyako la ifan shin tar; ve kera za sha gbenda u sule u ikon i wain ga.

¹⁹Icegh kua mtsee, ka ve uma mngerem ma senou kera, kape Sheol ka a er a mba ve er kwaghbo la.

²⁰Iyav mbu mbu mar nan mbu hungul nan, nan nyoho azôô, u yan, á kera umbur nan mayange je ga; kape á kever mban u perapera kera er kon nahan la.

²¹Ka or u nan sar kwaseikôm u a maren ga la, shi nan eren a kwasecôghol dedoo ga la.

²²Nahan kpaa, A rumun er mbaageev ve̱ tsa sha won sha tahav Nav; ve mough, shin er ve lu henen er vea kera war ga nahan kpaa.

²³Ka A de ve, ve̱ tema bem bem, ve̱ suur sha mi kpaa; man ashe Na nga sha igbenda ve.

²⁴Ve kende ayol a ve sha, shighe kpeghee tsô, maa ve kera lu ga; een, i kighir ve inya, i kar a ve kera er mbagenev cii nahan. I tôndo ve kera er asagher a wua nahan.

²⁵A lu nahan ga yô, ka an nana pasem er m lu or u aie, man nana gema kwaghôron wam una hingir gbilini?