Read tiv Yobu 30 Bible Online

Yobu 30 - tiv bible

Yobu 30

¹Kpa hegen yô, mba m lu tamen a ve la, mba nahan mo tar, ka ior mba uter vev kumam u me ver ve a iwa i mbakuranilev av imôngo ga.

²Agee a ave ve yan ma a seer mo nyi? Agee a iyolough kpaa kar hen ve kera.

³Ve kande sha ci u ibanave kua ijen; ve ngegher tar u ombor u kwagh a lu ker ga la.

⁴Ve zôr uihômon mba ahuuv; man amise a toho ka kwaghyan ve.

⁵I zenda ve ken ior kera; mba geren akenge a ve er ka ormbaiv yô.

⁶Nahan ka ken ikwever i shin apev ve tem ye, kua shin ahungwa a shin inya man ken ubarmbaavandev.

⁷Mba geren imo ken toho; ka ve kpela inya ve kohol shin atine a imo.

⁸Ka ônov mba abumeaior, een, ka ônov mba udangmbaiorov je, i zenda ve shin tar kera sha akpa.

⁹Man hegen yô, mo m hingir ve u wan mo icam, m hingir ve u ôron kwagh wam cam ce cam.

¹⁰M ndôhôr ve ishima, ve tile paleghaa a mo, kunya kôr ve u tan mo azer sha ishi kpaa ga.

¹¹Gadia A saghem kwange u ada, A heem; ve kera kôr lijam sha ishigh yagh ga.

¹²Agbilinaior moughom ken uwegh ku yanegh, mba mgbeghan mo angahar kera, mba kahan igbenda ve i mtim, sha u eren num a mo.

¹³Mba vihin gbenda wam, mba wasen mtim wam er a̱ za hemen, ve ayol a ve mba a ma orwasen ve ga.

¹⁴Mba van er ka ken ihuragar i i gbanger yô; ka ken atô u alôgh a ayoughough je, ve dolough ve ve sha a mo ye.

¹⁵Mciem gba tan mo iyol, mba mgbeghan mo icivir kera er ahumbe yô, mkpeyol wam sambe kera er ibeenegh yô.

¹⁶Hegen yô, ishima yam vihi kondo je, ayange a ican kpaa kôrom.

¹⁷Tugh yô, akuhe am lu sôôn mo je a poso kera, mnyoonom am ma ngeregh, nam mmem ga.

¹⁸Riga wam gema, sha agee Na a hemban la, a tsulem er monriga yô.

¹⁹A gbihim shin anmgbiôr, m hingir er vuulevu kua mtwem yô.

²⁰M ngu vaan a We, kpa U bughum zwa ga, m mough, m tile sha, kpa U gba kenger mo ving tsô.

²¹U gema U kera ngum or u zungwen mhôônom ga; ka sha agee a uwegh Ough U tevem a ican ye.

²²U kendem sha ahumbe, U erem m zende sha a, U soughom ken kume u hiar.

²³Gadia m fa ka U ka zan a mo ken ku, man ken ya u i ver er uumace cii ve̱ kohol ker la.

²⁴Or ka nana gban yô, nan gese uwegh ku nan gaa? Shin ken mtim u nan yô, nana vaan, nana keren iwasen gaa?

²⁵M vaa sha ci u or u ican i eren nan la gaa? Ishima lu vihin mo sha ci u mbaibanave gaa?

²⁶Gadia er m lu veren ishima sha kwaghdoon yô, ifer gema va ande; er m ver ashe mer me nenge iwanger yô, ime gema va.

²⁷Myam zômon mo, ma mem ga; ayange a ican ta sha a mo.

²⁸M ile, kpa ka sha ci u iyange ga; ka m mough m tile sha ken mkohol, m vaa, m ker iwasen.

²⁹M hingir anngô u ugbaseela, or u zenden a ukonkofi imôngo.

³⁰Kwav wam hingir il, ngu bughun kera, akuhe am hia sha mtsee.

³¹Ka nahan man molo wam a hingir kwelegh, imar yam kpaa hingir imo i mbavaan ye.