Read tiv Yobu 33 Bible Online

Yobu 33 - tiv bible

Yobu 33

¹Yô, shi ungwa kwaghôron wam, Yobu ver ato sha akaaôron am cii.

²Nenge, m bugh zwa wam ve, nombor wam ngu ôron kwagh ken zwa wam.

³Akaaôron am nga pasen mimi u ishima yam; kwagh u zwa wam u fe yô, ka un ua ôr sha ishima i wang ye.

⁴Jijingi u Aôndo gbam, iôôn i Uhembanagee ngi nan mo uma.

⁵Wea fatyô yô, kaam imo; kohol iyol sha ishigh yagh, kegh ase iyol.

⁶Nenge, sha ishigh ki Aôndo yô, m ngu er we nahan vough; ka shin inya i coon mo kpaa ye.

⁷Yô, mciem am maa ta u iyol ga, mkighir wam kpaa, una yuhwa u iyol ga.

⁸Mimi je, u ôr kwagh sha ato am, m ungwa, m ungwa iov i kwaghôron wou er:

⁹M ngu wang, m per tindi ga, m ngu tsenger tsenger je, ifer ngi ken a mo je ga.

¹⁰Nenge, ngu keren atôakaa sha a mo, A nengem er m ngu orihom Na nahan;

¹¹A mandem igbe angahar, tevem sha igbenda yam cii.

¹²Nenge, me kaa u, sha kwagh ne u ngu a ishô ga, gadia Aôndo hemba or.

¹³Man er nan u zehe a Na wer: Ngu nan imo sha akaaôron a or cii ga, nahana?

¹⁴Gadia Aôndo ka A ôr kwagh gbenda môm, een, igbenda ihiar je kpaa, kpa or ver ikav ga.

¹⁵Ken mnyam ma cien, man ken mpase u ken mnya tugh, zum u or ka nana yav mem mem, ken mmeer u mnya sha gambe la,

¹⁶hen shighe la, ka A bugh ior ato, A var ityesen i A tesen ve la ikav,

¹⁷sha u Una yange or awashima u nan, shi Una bunde nan iyolgengese kpaa;

¹⁸sha er Una yima uma u nan shin ihungwa, a̱ de saan sha sanker kpaa ga.

¹⁹Ka i tsaha nan kpaa sha mnyoonom sha gambe u nan je, man sha mtseenem ken akuhe a nan,

²⁰je uma u nan a nyagh ruam, man ishima i nan i nyagh kwaghyan u dedoo;

²¹inyam i nan i ndiir kera i saa ishe, akuhe a nan a ngise i nengen a mi ga kpaa, a due.

²²Mimi je uma u nan a kporom ikua a ihungwa, man uma u nan kpaa kporom hen mbatimin nan.

²³Aluer ortyom u Sha una lu a nan, ortafinta, môm ken dubu, sha u tesen or kwagh u a lu vough, u nana er yô;

²⁴man aluer Una zungwe nan mhôônom, Una kaa er: Yima nan, nana̱ de senen shin ihungwa ga, M zua a ipaan ve;

²⁵zum la inyam i nan ia hingir hegh á hemba i wanye kpaa; nana hide nana hingir er sha ayange a nan lu iyev la yô.

²⁶Nana sôn Aôndo, yô, Un kpaa á doo Un a nan; nahan nana nenge ishigh Nagh a iember; kape ka A hire or a perapera u nan la.

²⁷Nan gba wan icam sha ishigh ki iorough, kaan er: M er kwaghbo, m undu gbenda u mimi, kpa i kera orom iyev ga.

²⁸A paa uma wam er a̱ de senen shin ihungwa ga, uma wam kpaa ngu ember iwanger.

²⁹Nenge, akaa ne cii ka Aôndo A eren a sha or ye, kwa har, een, kwa tar je kpaa,

³⁰sha u hiden a uma u nan shin ihungwa kera, sha er iwanger i uma i̱ taan nan iyol yô.

³¹Ver ishima dedoo, Yobu ver ato her a mo; huan ving, mo me ôr kwagh.

³²Aluer kwaghôron ngu u yô, kaam; Ôr ase, gadia kam pe nan we ishô.

³³A lu nahan ga yô, we ver ato her a mo, huan ving, mo me tese u kwaghfan.