Read tiv Yobu 36 Bible Online

Yobu 36 - tiv bible

Yobu 36

¹Tsô Elihu shi seer kaan er:

²Yô, wa ishima a mo kpeghee, m̱ tese u; gadia kwaghôron shi ngu sha ci u Aôndo.

³Me za va a mfe wam ken ica je, me na Un u A gbem la mimi.

⁴Gadia mimi je, kwaghôron wam ka u aie ga, or u nan lu a mfe u mimi yô, nan ngu a we imôngo.

⁵Aôndo yô, ka u ageegh je, lahan ma or ga; ngu a tahav mbu mkav u ganden cii,

⁶kor uma u mbaaferev ga, kpaa ne mbayanican kwagh u a kom sha a ve yô.

⁷A tôô ashe Na sha mbaperapera kera ga; kpa A ver ve, ve tema a utor imôngo sha ikônough ki torough gbem, i kende ve sha kpishi.

⁸Aluer i mande ve agbe, man ican tser ve kpaa,

⁹nahan A pase ve aeren a ve, kua afer a ve, er ve kenden ayol a ve sha yô.

¹⁰Ka A bugh ve ato kpaa, sha u ve̱ ungwa ityesen, A kaa a ve er, ve̱ undu ifer ve̱ hide.

¹¹Aluer vea wa iko, vea civir Un yô, vea zua a mkpeyol sha ayange a ve, man á doo ve iyol ken anyom a ve kpaa.

¹²Kpa aluer vea wa iko ga yô, vea saa ishe sha sanker, man vea kpe a mfe shio.

¹³Mba ve we Aôndo iko ken asema ve ga yô, ve mba a ishima i nyoon; mba keren iwasen shighe u A kange ve la ga.

¹⁴Ka ve kpe iyev, uma ve a saa ishe er mbahôngorouv nahan.

¹⁵Ka A yima or u yan ican sha ican i nan la, A bugh ve ato sha zayol.

¹⁶Kape ka A urugh we, A due a we ken bocan kera la, A va a we hen ijiir i gbangese, i i hoghol ga yô; kwaghyan u i ver u sha tebul kpaa, mkurem ma ngee sha mi.

¹⁷Kpa u kuma ijirôron i á ôr mbaaferev la; ijirôron kua mtsaha kôr u doo doo.

¹⁸Ver ishima, ishimanyoon i̱ de ze a we ken tarnahan ga; man shi mvese u ipaan a̱ de ne u mtsum ga.

¹⁹Inyaregh you kia kuma u yangen ican i eren we, shin tahav mbu agee ou la ciilii?

²⁰Tugh mbula mbu̱ de sar u ga, shighe u ka i kar a akuraior hen ijiir i a kera la.

²¹Kura iyol, de kera veren ishima sha ifer ga, gadia kwagh ne hemba doon we a ican i yan.

²²Nenge, Aôndo ngu eren kwagh u icivirigh sha agee Na; ka an nan lu ortesen er Un nahana?

²³Ka an nan tese Un gbenda? Man shi ka an nana kaa er: Ifere?

²⁴Umbur u civir tom Na, u ior ve teren u sha icam i wan la.

²⁵Ior cii ve nenge a u, or ka nan nenge a u ken ica je.

²⁶Nenge, Aôndo gba ikôr je, gande mfe wase; iyenge i anyom Na gande u tôvon fan.

²⁷Gadia ka A kohol aberamnger, A hamber ura sha tulugh Na,

²⁸A er abeen a nee ura shin inya, u nee sha ior kpishi wuee.

²⁹Ma or nana fatyô u kaven msamber u abeen kua mdor u ityumbe Na kpa?

³⁰Nenge, ka A samber iwanger Na, i cir Un iyol; ka A cir aiv a zegemnger kpaa.

³¹Gadia ka sha akaa angan ka A ôr akuraior ijir, shi A na kwaghyan wuee kpaa ye.

³²Ka A gema inyiar A cir ave Na a mi; A na i zwa i gba sha orhendan.

³³Mdor u i la, ka a pase Un; uzendenya kpaa fa er A lu van yô.