Read tiv Yobu 37 Bible Online

Yobu 37 - tiv bible

Yobu 37

¹Sha kwagh ne kpaa ishima ngi tan mo kwe, kera ngim ikum ga.

²Yô, ver ato ungwa nen ihuran i imo Na, man kume u u dugh ken zwa Na kpaa.

³Ka A er u u sambe shin tar cii, man inyiar Na kpaa zan zan ar sha akighir a tar je.

⁴Ken masetyô yô, imo gba kumen, A gba duran sha imo Na i ageegh; A yange inyiar shighe u ka a ungwa imo Na la kpaa ga.

⁵Aôndo ka A dura sha imo Na i cieryol, eren uzegembaakaav mba ve gande se u fan yô.

⁶Gadia ka A kaa a senou er: Haa shin inya; man a ura u nôôn kpishi kpaa er: Taver.

⁷Ka A kusu uwegh ku hanma or, sha er ior mba A gbe ve cii, ve̱ fa tom Na.

⁸Shighe la inyamtoho i ker ajiir a yeren, i tema ken avur a i.

⁹Ka ken iyou na hiar a dugh ye, man wuhe yô, ka ken ahumbe a a samben abeen la.

¹⁰Ka sha iôôn i Aôndo mngerem ma kôrough sha wuhe ye; mngerem ma gbanger kpaa, ma kôrough her.

¹¹Ka A iv abeen a mngerem; A samber abeen a Na a nyiar la.

¹²Ka a goom wue wue sha mver Na, a eren hanma kwagh u A kaa a la, sha tar u ior ve lu sha mi ne cii;

¹³shin ka sha ci u mtsaha, shin ka sha ci u tar Na, shin ka sha ci u erdoo, ka A na a a va.

¹⁴Ver ato sha kwagh ne, Yobu; tile ving, umbur ityom i Aôndo i kpilighyol la.

¹⁵U fa er Aôndo ka A wa i tindi, er A er iwanger i abeen a Na a nyiar la kpa?

¹⁶Shin u fa er i er man abeen a til kpa? Ka ityom i kpilighyol i Un u A lu a mfe u vough la je.

¹⁷We u akondo ou a tsee, zum u tar ka u huan sha ahumbe a imbusutariyan la.

¹⁸U fatyô u samber kwavaôndo a Na imôngo, u u taver er jingi i i ker i a ker la, nahan kpa?

¹⁹Tese se kwagh u sé kaa Un yô; gadia se fatyô u van a kwaghôron ga, sha ci u ime.

²⁰Á kaa Un, zum u i sarem pe ôron kwagh kpa? Shin or nan kaan er i sar nan pe ma i tim nan kera, mayange kpa?

²¹Hegen yô, or fetyô u kenger iwanger i i engem sha kwavaôndo, zum u ahumbe a kar a ese u kera la ga.

²²Ken imbusutarimese yô, iengem i lun er zenaria nahan due; kpa Aôndo yô, tema sha icivir Na i hemban la, ta ihindi je cier iyol.

²³Uhembanagee yô, se fatyô u kaven Un ga; A hemba agee; kpa ijirôron kua m-iv u perapera yô, Una nzughul a mi ga.

²⁴Ka nahan man ior ve cie Un ye, we mba ve fe er ve mba mbafankwagh la, iko ga.