Read tiv Yobu 4 Bible Online

Yobu 4 - tiv bible

Yobu 4

¹Tsô Elifasa Orteman, gema kaa er:

²Aluer or nana nôngo u ôron kwagh a we, nahan ishima ia vihi wee? Kpa, ka an nana wa ishima nana de kwaghôrono?

³Nenge, we u lu tesen ior kpishi, u taver ave a kpen la.

⁴Akaaôron a ou suwe un u a nenge gbev la, u taver anu a a tenger la.

⁵Kpa hegen er kwagh ne a ve sha a we yô, ishima yina u; er a bende a we yô, kondo u iyol.

⁶Mcieaôndo wou ka ishuur wou gaa, perapera u aeren a ou kpaa ka ishimaverenkeghen you gaa?

⁷Shi umbur ase yô, or u lun a ibo ga, nan saan ishe mayange kpa? Shin ka han je man lu i gber mbaperapera kera?

⁸Sha mnenge wam yô, mba ve tsôghol ifer, kua mbalôôn anzughul, ka ve sunda di sha mi vough.

⁹Sha iôôn i Aôndo tsô, ka ve tim, man sha humbe u iyugh Na, ka ve saa kera.

¹⁰Kume u begha, man imo i iperabegha, anyi a agumabegha la, i kever a.

¹¹Tsebegha ka a kpe sha ci u mban u swase, ônov mba ngôbegha i sambe ve kera.

¹²Iyange i ôrom kwaghhuwa; togh agh ungwa kwagh u i er ivarivase la;

¹³ken mbamhen mba ve dugh sha akaa a i nengen a ken mnya tugh, zum u mnyam ka ma kôr ior yum la,

¹⁴mciem tam iyol, kua akarkase kpaa, je akuhe am cii tsongor.

¹⁵Tsô jijingi karem sha ishi vishi; ikeende timim iyol.

¹⁶A tile, kpa m fatyô u kaven mlu na ga; eev mbu ma kwagh lum sha ashe; m ungwa imo i ivarivase, er:

¹⁷Or u nan lu a ku iyol, nana lu perapera sha ishigh ki Aôndo kpa? Or nana lu wang sha ishigh ki u A gbe nan jee?

¹⁸Nenge, A suur sha mbatomov Nav ga; mbatyomov Nav mba Shaav kpaa ka A zua ve a kwagh u kpeegh;

¹⁹man hire mban mba ve tem ken ayou a inyaagh, a amagh a a, a lu shin vuulevu ne, mba i her ve er ivina nahana!

²⁰Ka i tim ve hen haregh u pepe man u iyangeibeen; ka ve saa gbem, ma or nan wa ve iko ga.

²¹I kera tsuwe kor u tenti ve ken a ve kera gaa? Ka ve gba kpen tsô, a kwaghfan kpaa ga.