Read tiv Yobu 7 Bible Online

Yobu 7 - tiv bible

Yobu 7

¹Or nenge sha ican sha won gaa? Ayange a nan kpaa kera nga er a or u eren tom sha tôndo nahan gaa?

²Er kpan u mure ka a sar nan tsung yô, man er or u eren tom sha tôndo ka nan ver ishima sha injar i nan nahan,

³kape i kar kwar i nem sha iwer i ican ne, shi i verem aime a a lu a mmem ga yô.

⁴Er ka mea yav inya yô, m kaa mer: Shighe shi nan man me mougho? Tugh tsa yum; m zer geman gbem, kumam iyol, zan zan sev av.

⁵Azôô kua akpoghol a inyaagh cirim iyol; kwavyolough wam ka u kôrough shi u gba ijumbu.

⁶Ayange am hemba karen fefa a akusha u ortumenikondo; nga karen, ishimaverenkeghen kpaa ngi ga.

⁷Umbur er uma wam a lu humbe yô; ashe am kpaa aa kera nenge a kwagh u doon mayange ga.

⁸Ishe i or u nan nenge a mo la, ia kera nenge a mo mayange ga; ashe a ou aa lu sha a mo, kpa me kera lu ga.

⁹Er ibeenegh ka ki sambe, ki ndiir kera nahan, kape or u nan sen shin Sheol nana kera hide ga la.

¹⁰Nana kera hide hen ya u nan ga, man ijiir i nan kpaa ia kera fa nan ga.

¹¹Ka nahan man mo kpaa, me kera kusu zwa wam ga ye, me ôr kwagh sha mcihi u jijingi wam, me vaa ican sha ishimavihin tsung i uma wam ne.

¹²Mo m ngu zegemngere, shin inyam i cieryol i ken zegemngere, je U gema U ver orkuran moo?

¹³Zum u ka mea kaa mer: Gambe wam una surum ishima, man ikagh yagh ki yaven mi kia yôhôl mo ishima yô,

¹⁴U gema U tam mciem iyol sha mnyam ma cien, shi U tam mciem iyol sha akaa a i nengen a mi ken mnya la;

¹⁵zan zan je yô, m tsuwa ihamber iker, ku hembam doon a akuhe am ne.

¹⁶Uma wam ndôhôr mo ishima; kera kam ka lun uma zan zan ga; yô, dem, gadia ayange am ka gbilinkwagh tsô.

¹⁷Or ngu nyi je man U kenden nan sha, man U veren ishima You sha a nan kpaa?

¹⁸Man U ser nan hanma sev, shi U karen nan hanma shighe kpaa?

¹⁹Ka hanma shighe je man Ú de u kenger mo, man U shi dem, m̱ kar menan ijer yama?

²⁰A lu m er kwaghbo yô, ka nyi m er U, We Orkuran ioro? Er nan je, man U gemam, m hingir We ishor i keren, je iyol yam i hingir mo ikav mbi yuhwana?

²¹Er nan man U dem kwaghbo wam, man U hir a iferkwagh yam kera ga? Gadia ahegen shi côhin tsô, me yav shin vuulevu; Ú kerem, kpa me lu ga.