Read tiv Yobu 8 Bible Online

Yobu 8 - tiv bible

Yobu 8

¹Tsô Bildadi Orsuhi, gema kaa er:

²Ka hanma shighen je man ú de u ôron anzaakaa nee? man shi akaaôron a ken zwa wou kpaa aa de u lun er zegeahumbe nahana?

³Nahan Aôndo Una ôr ijir sha mimi ga zee? Shin Uhembanagee Una kaha Una undu mimi zee?

⁴Aluer ônov ou ve er Un kwaghbo yô, A gema A na di ve sha ikev i ifer ve la.

⁵Aluer we u ker Aôndo, man u zamber a Uhembanagee,

⁶aluer wea lu wang man jighilaa yô, ma A nder, ma A we u iko kpee je, ma A hir a ya wou u perapera her.

⁷Man shi er mhii wou a lu côhin nahan kpaa, mkur wou yô, una seer kpishi.

⁸Shi pine ase sha kwagh u kov u ngise ver ishima sha kwagh u uter vev, lu ve tôv yô.

⁹Gadia se, se mba mbanyenev tsô, se fa ma kwagh ga; gayô, ayange ase a shin tar ne nga er mure nahan tsô.

¹⁰Ka ve, vea tese u, man vea kaa u, shi vea ôr akaa a ken asema a ve ye gaa?

¹¹Papiru una gba menden henpe angbiôr a lu ga kpa? Man awoo di kpaa, aa gba vesen henpe mngerem ma lu ga kpa?

¹²Er ve lu ndor, man i lu a tôndo ve ga tsô, ve use je er toho ugen u lu a use ga yô.

¹³Kape igbenda i mba ve hungul Aôndo cii i lu la; ishimaverenkeghen i or u wan Aôndo iko ga yô, ia saa ishe.

¹⁴Ishimaveren i nan ia saa ishe, ishuur u nan una lu er kper u tetange yô,

¹⁵Nana lian sha iyou i nan, kpa ia tile ga; nana kôr gbang gbang, kpa ia lu her gbem ga.

¹⁶Nan ngu ndor gese gese ken oo, agbaa a nan samber sha sule u nan.

¹⁷Amise a nan kamber sha tihiawen, nga shindin ken atô u awen.

¹⁸Aluer á tim nan hen ijiir i nan kera yô, ia nyiman nan, er: Mayange je m ngu a nenge a we ga.

¹⁹Nenge, ka iember i gbenda u nan je la, shin vuulevu yô, mbagenev vea mende.

²⁰Nenge, Aôndo Una gbihi or u jighilii kera ga, Una wase mbaerenafer mayange ga.

²¹Una va iv zwa wou a ahan, ityumbuzwaagh you kpaa a iember.

²²Mba ve ker u ihom yô, kunya ua cir ve iyol; tenti u mbaaferev kpaa, una kera lu ga.