Read tiv Upasalmi 10 Bible Online

Upasalmi 10 - tiv bible

Upasalmi 10

¹TERE, ka nyi U til ca; ka nyi U yer iyol sha ayange a mzeyolo?

²Sha mhagher u iferor yô, ngu tôvon icanor ityô tsung; i̱ kôr ve sha akaahônon a ve hen la.

³Gadia orifer ka a ta ihagh sha kwagh u isharen i ken ishima na, a ver oreren hua doo doo, a gema a laha TER.

⁴Iferor ka nana manger yô, nan kaa er: Una or iyev ga; sha mbamhen nav cii, a hen er: Aôndo ngu ga.

⁵Igbenda na cii ngi lagh un gbem; ajiraôron a Ou nga sha je, a gba ca a nan; mbaahendanev nav cii kpaa, a ta ve ahenge.

⁶Ken ishima na yô, ngu a kaan er: Me tenger ga, zan zan sha ikov ikov kpaa, ican ia tserem mayange ga.

⁷Zwa na mgbough a ityuhwanev man icugh man mkighir; kwaghbo man kwagh u ifer ve lu un shin nombor.

⁸Ka ken ajiir a iuvugh a ken angarev a tem ye; ken ajiir a yeren la, ka a wuan mbaishôôv. A dughun aseeraior ashe ken myer,

⁹a kegh ken iuv er begha ken bar na nahan, a kegh sha u kôron icanor; a kôr icanor zum u a cimin nan ken kper na yô.

¹⁰A gure, a var inya; mba ve lu aseer yô, ve gba sha ikev na.

¹¹Ken ishima na yô, ngu a kaa er: Hungul Aôndo ve, A yer ishigh Nagh, Una nenge a min mayange ga.

¹²Mough sha TERE, kende uwegh Ough sha, Aôndo, mbaatsanev ve̱ de hungul We ga.

¹³Ka nyi man iferor ka nan laha Aôndo; nan kaan ken ishima i nan er: Ú or iyev ga, ase?

¹⁴U nenge a mi; gadia We, U ngu nengen zayol man ishimavihin, sha er Ú tôô sha uwegh Ough; ka her a We man isheeror ka i ver iyol i i ye; We, U lu Orwasen u ancôghol.

¹⁵Sombo ikasewe i iferor man dangor la, time ifer na zan zan ma kwagh a̱ de shi ga.

¹⁶TER ka Tor gbem sha won; atôatyev tim ken tar Na kera.

¹⁷TERE, U ungwa isharen i mbaasemaleghlegh; U taver asema ve, U gema U ver ato sha u ungwan,

¹⁸sha u eren a ancôghol vough man a u i kighir nan a ican la kpaa, sha er or u nan lu u tar ne tsô, nana̱ de kera shi naan mciem mayange ga.