Read tiv Upasalmi 104 Bible Online

Upasalmi 104 - tiv bible

Upasalmi 104

¹Wuese TER, we uma wam! TERE, Aôndo wam, We, U hemba cii, U haa icivir man iengem iyol.

²A cir iwanger iyol er ka ikondo yô, A samber Usha er ka tenti nahan;

³A tim imagh ki ukpombaayoughouv Nav Sha, sha mngerem ma kpishim; ka A gema abeen hingir ikyekye Na, A zenden sha akper a ahumbe;

⁴A gema ahumbe a hingir mbatyomov Nav, man iniomborusu hingir mbatomov Nav.

⁵U tim tar sha amagh a u, sha er u̱ de tenger mayange ga yô.

⁶U cir u zegemnger er ka ikondo i cirin iyol yô, mngerem kar iwo sha cii;

⁷ma ongo a ungwa myange Wou tsô, ma yevese, ma ongo a ungwa imo i idyuran You tsô, ma num ayem;

⁸iwo due, apev gba hen ajiir a U vande sôron sha ci ve la.

⁹U ver ma ikighir Wer ma de peren ma hiden, ma va cirin tar ga.

¹⁰A er ambor a due shin apev, nga kough ken ihigha i iwoogh,

¹¹ishôso i ken toho cii ngi me a, ujaki mba ken toho mba been imura ve.

¹²Ka hen a inyon i sha kpaa i tem, i gberen amo sha ahu ye.

¹³Ka A na iwo mngerem, ma due sha ukpombaayoughouv Nav mba Shaav; tar iv gbing sha atam a aeren a Ou la.

¹⁴A er toho u mende sha ci u uile, man imendenev sha ci u or nana eren tom a mbi, sha er nana zuan a kwaghyan shin inya yô,

¹⁵man zar u wain sha u nan or msaanyol, man mkurem sha u engem or ishigh, man ruam sha u taver or ishima yô.

¹⁶Ikon i TER zua a kwagh, kuma i, ka usedar mba sha Lebanon mba A môôr la,

¹⁷henpe inyon i we aya a i yô; ikon i fer ka ya u ipevnor.

¹⁸Ugôgômbaiwoov ka sha ci u ivotoho je; man avande ka ajiir a yeren a akuwa je.

¹⁹A ver uwer sha ci u ashighe; iyange kpaa fa shighe u i u milen.

²⁰Ka U er ime i wa i hingir tugh, shighe u inyamtoho cii ka i due.

²¹Agumabegha ka a taan kume, a yaren ikôr, a keren kwaghyan hen Aôndo.

²²Iyange ka ia duen yô, a ta ibalegh sha, a za yav ken ajiir a a.

²³Or ka nan due, nan yar tom u nan, nan er u, zan zan iyange i kar been.

²⁴Kpash! TERE, ityom You ngi atô kposo kposo, U er i cii sha kwaghfan, tar iv a akaa a U gbe la.

²⁵Zegemnger ngula, a kehe shi a gbangese kpaa, inyarev mbi zenden ker, mbi ngee, gande u ôron je, ishôso i kiriki man i vesen.

²⁶Ka keregh utso ve zenden ye, man Leviatan u U gbe un sha ci u a numbe shimi, ngu ker.

²⁷Mban cii mba veren ashe sha a We, sha u ma U ne ve kwaghyan sha ashighe ashighe yô.

²⁸Kwagh u U ne ve ka ve kura un je; ka U bugh uwegh Ough, nahan ve ide sha a kaa a dedoo je.

²⁹Ka Wea yer ishigh You yô, i za ve iyol; ka Wea tôô ve iôôn kera yô, ve kpe, ve gema ve hingir vuulevu.

³⁰Ka Wea tindi Jijingi Wou yô, i gba ve; U gema ishigh ki inyaagh ki hingir ki hegh.

³¹Iengem i TER i̱ lu gbem; TER A̱ ember sha ityom Na,

³²Un u ka A kenger tar, tsô u gbidye ikarikase iyol la, A bende iwo, tsô mnyim ma due.

³³Me wa TER icam sha ayange a m lu uma yô, me wa icam me ter Aôndo wam er m lu her yô.

³⁴Mbamhen av ken ishima ma ve doo Un; mo yô, me ember ken TER tsung.

³⁵Mbaasorabo ma ve bee shin tar, mbaaferev kpaa ve̱ de kera lu ga. Wuese TER, we uma wam! Haleluya.