Read tiv Upasalmi 105 Bible Online

Upasalmi 105 - tiv bible

Upasalmi 105

¹Wuese nen TER, yila nen sha iti Na, pase nen akuraior ityom Na.

²Wa icam ter nen Un, wa nen atsam a wuese Un, ôron nen kwagh u akaa Na a kpilighyol cii.

³Ta nen ihagh sha icighanti Na, asema a mba ve keren TER yô, a̱ ember tsung.

⁴Ker nen TER kua agee a Na kpaa, keren nen ishigh Nagh gbem.

⁵Umbur nen ityom Na i kpilighyol i A er yô, uivande Nav kua ajiraôron a ken zwa Na,

⁶ne tsombor u wanakiriki Na Aberaham, ne ônov mba Yakob, ne uicuwan Nav.

⁷Un TER ka Aôndo wase je, ajiraôron a Na nga sha won cii.

⁸A umbur ikuryan Na gbem, —ka mkaanem ma A kaa sha ci u ikov dubu je la—

⁹ikuryan i A ya a Aberaham, man mbum Na a Isaka;

¹⁰A shi A taver i, hingir tindi hen Yakob, hen Iserael kpaa hingir icôronikuryan je,

¹¹er lu kaan er: Ka we je, Me na u tar u Kanaan, u̱ lu kwar u dyako wen.

¹²Zum u ve lu ior kpeghee tsô, ve ndahar mimi, man ve lu shir ken u la,

¹³ve lu zenden ken akuraior sha adondo adondo, ve mough ken tartor ugen ve yem ken ikurior igen kposo.

¹⁴A rumun ma or nzughul a ve ga, A zôhô a utor sha ci ve kpaa,

¹⁵lu kaan er: De bende nen mba M shigh ve mkurem la ave ga, mbaprofeti Av kpaa de eren nen ve kwagh u vihin ga.

¹⁶A yila ijen, gba hen tar la, A vihi kwaghyan u ve suur sha mi la kera cii.

¹⁷A tindi or vande hemen ve; i tee Yosev, hingir kpan;

¹⁸i mande un agbe shin angahar, ican er un sha iyô,

¹⁹zan zan shighe u imo Na kar kuren, man mkaanem ma TER kar un kera la.

²⁰Tor tindi er i̱ pase un, i̱ tuhwa; ka ortaregh u ior pase un tuhwa ye;

²¹a gema ya na cii a wa un sha ikev, er a̱ nengen sha akaa a na cii,

²²a̱ kangen mbatarev nav sha ishima na, man a̱ tesen mbavesen nav kwaghfan kpaa.

²³Iserael kpaa, va ken Igipiti, Yakob za lu shir ken tar u Ham.

²⁴A er ior nav ngee kpishi, ve taver ve hemba mbaahendanev vev agee.

²⁵A gema asema a ve, er ve̱ kôr ior Nav ihom, ve er ayom a bo sha mbayev Nav kpaa.

²⁶A tindi wanakiriki Na Mose man Aron u A tsuwa un yô.

²⁷Ve za er uivande Nav hen ve, kua akaakpilighyol kpaa ken tar u Ham.

²⁸A na ime, za wa keregh, ve hendan a imo Na ga.

²⁹A gema mngerem vem hingir awambe, A tim ishu ve kera.

³⁰Asôhô mgbough ken tar ve, kua ken ayou a mbatarev vev kpaa.

³¹A ôr kwagh, tsô ikpila-akughô va, inyarev mbi nyuman gba ken tar ve cii.

³²A nôô ve ura u awomboogh, man usu u inyiar kpaa lu ken tar ve.

³³A vihi ikon ve i wain man i tur kera, shi A kever ikon i ken tar ve kpaa.

³⁴A ôr kwagh, nahan ikomon va, kua agum a na, ngee gande u ôron,

³⁵i ya ahu a ken tar ve cii, i ya iyiav mbi ken sule ve kpaa.

³⁶A wua ônovmbaiundav ken tar ve cii kpaa, ka mhii u agee a ve je la.

³⁷Nahan A na ve ve due a azurfa man zenaria; ma or u nôngon gbev lu ken ikwe Na ga.

³⁸Zum u ve yem la, doo Mbaigipiti, gadia ve cier ve iyol.

³⁹A samber ibeenegh hingir kwagh u cirin, man usu sha u u̱ wanger tugh yô.

⁴⁰Ve sôn, A tindi ve a utakange, A na ve ruam u Sha kuma ve.

⁴¹A bugh vande, tsô mngerem due, kuwa ken ajiir a ombor er ka ifi yô.

⁴²Gadia A umbur icighanmkaan Na, kua wanakiriki Na Aberaham.

⁴³A due a ior Nav saan saan, uicuwan Nav kpaa a atsam a ember.

⁴⁴A gema ityar i akuraior, A na ve, ve ngohol akaa a ior lu yan ican sha mi yô,

⁴⁵sha er ve̱ wa iko sha akaawan a Na, man ve̱ ver ishima sha atindi a Na kpaa. Haleluya.