Read tiv Upasalmi 118 Bible Online

Upasalmi 118 - tiv bible

Upasalmi 118

¹Wuese nen TER, gadia A doo, gadia erdoo Na ka u tsôron gbem sha won je.

²Iserael a̱ kaa er: Erdoo Na ka u tsôron gbem sha won je.

³Ya u Aron a̱ kaa er: Erdoo Na ka u tsôron gbem sha won je.

⁴Mba ve cie TER ve̱ kaa er: Erdoo Na ka u tsôron gbem sha won.

⁵Ken ican i i tserem la m yila TER; TER ungwa imo yam, A verem ken ijiir i gbanger.

⁶TER ta ikaa a mo, me kera cia ga, ka nyi je or á ereme?

⁷TER ta ikaa a mo hingir orwasen mo, nahan me nenge a awashima wam sha mba ve kerem ihom la.

⁸Hemba doon u suur sha TER a u veren ishima sha or.

⁹Hemba doon u suur sha TER a u veren ishima sha mbatarev.

¹⁰Akuraior cii kasem; ka ken iti i TER man m ngbegh a kera ye.

¹¹A kasem, een, a kasem; ka ken iti i TER man m ngbegh a kera ye.

¹²A kasem er iyough i ken toho yô; i pir a er usu u sha ayegher a ikon nahan.

¹³U mgbegham ngegh wer, m̱ gba, kpa TER wasem.

¹⁴Ka TER A lu agee am man icam yam ye, A hingir myem wam kpaa.

¹⁵Imo i iember kua i myom ngi ken utenti mba mbaperapera; uwegh ku yanegh ku TER ku eren akaa a ageegh,

¹⁶uwegh ku yanegh ku TER ku kende sha; uwegh ku yanegh ku TER ku eren akaa a ageegh.

¹⁷Me kpe ga, me lu uma, me pase ityom i TER.

¹⁸TER tsaham taver je, kpa A nam ken ku ga.

¹⁹Bughum ihinda i perapera, m̱ nyôr sha i, m̱ za sugh TER.

²⁰Ka hunda u TER je ne, mbaperapera vea nyôr sha u.

²¹Me wuese We, gadia U ungwa imo yam, man U hingir myom wam kpaa.

²²Iwen i mbamaan ve venda i la, ka i je, i hingir i sha zongo ye.

²³Ka TER A er kwagh ne ye, ka kwagh u kpilighyol sha ashe ase.

²⁴Ka iyange i TER A er i je ne, sé ember nen, i̱ saan se iyol sha i kpaa.

²⁵TERE, shi yima! TERE, shi na ikôr i̱ lagha!

²⁶Saan or u nan nyer ken iti i TER la iyol; se mba nan ne iveren i dedoo i ken ya u TER.

²⁷TER ka Aôndo, A na se iwanger kpaa. Kange nen nagh sha ikor je, za nen a mi hen akor a atse a nanden nagh sha mi la.

²⁸We U ngu Aôndo wam, me wuese We, We Aôndo wam me civir We.

²⁹Wuese nen TER, gadia A doo, gadia erdoo Na ka u tsôron gbem sha won.