Read tiv Upasalmi 132 Bible Online

Upasalmi 132 - tiv bible

Upasalmi 132

¹TERE, umbur Davidi kua ican na cii;

²er a bum a TER, man a tsegha zwa a Uageegh u Yakob yô, er:

³Mimi je, me nyôr ken tenti u iyou yam la ga, me unde sha gambe wam kpaa ga,

⁴me keer mnyam ashe ga, mnyam ma meer tsô kpaa, maa vam sha akurashee ga,

⁵saa me vande zuan TER a ijiir ve, ijiir i teman sha ci u Uageegh u Yakob.

⁶Nenge, se ungwa kwagh ne ken Eferata, se zua a mi ken ikôngough ki Yaar.

⁷Sé za nen hen ijiir Na i teman, sé gure nen inya hen anar Na u tan angahar a mi.

⁸TERE, mough, za hen ijiir You i memen, We vea areki u agee a Ou la!

⁹I̱ cir upristi Ou perapera iyol; mba i doo U a ve la, ve̱ ember tsung je.

¹⁰De vende un u U shigh un mkurem la ga, sha ci u wanakiriki Wou Davidi.

¹¹TER bum a Davidi sha mimi, Una gema kposo ga er: Me ver wan wou iyol you je Mer, a̱ tema sha ikônough you ki torough.

¹²Aluer ônov ou vea kura ikuryan Yam man mpase Wam u Me tese ve yô, ônov vev kpaa vea tema sha ikônough you ki torough gbem sha won.

¹³Gadia Ter tsuwa Shion, sar Un tsung sha ci u ijiir Na i teman:

¹⁴Ingin ka ijiir Yam i memen ker gbem sha won je ne, ka ker Me tema ye, gadia i sarem yum.

¹⁵Me ver kwaghyan na dedoo, Me na mbaatsanev nav kwaghyan una kuma ve.

¹⁶Upristi nav kpaa, Me cir ve myom iyol, mba i doo Un a ve la kpaa, vea ember tsung je.

¹⁷Ka keregh je man Me er korough kua mende Davidi ye; M sôr un u M shigh un mkurem la imenger.

¹⁸Me cir mbaihomov nav kunya iyol, Kpa un yô, idyer na i tor ia engem sha a na. Ka icam i zan iniongo. Ka i Davidi