Read tiv Upasalmi 147 Bible Online

Upasalmi 147 - tiv bible

Upasalmi 147

¹Wuese TER, gadia doo u wan atsam wuese Aôndo wase, gadia ka kwagh u doon tsung, iwuese ka kwagh u doon.

²TER maan Yerusalem, ka A kohol mba i te ve ken Iserael kera la, imôngo.

³Ka A sôr mba asema a vihi ve tsung la, A kange ve avav.

⁴A ôr iyenge i asan, A ii a ati cii.

⁵Ter wase hemba cii, A taver agee kpaa, mfe Na ngu a ikighir ga.

⁶TER suwe mbaasemaleghlegh la, ka A shirigh a mbaaferev inya.

⁷Wa nen icam, ter nen TER a ishughun, wa nen atsam a wuese Aôndo wase sha adiguve,

⁸Un u A cir kwavaôndo sha abeen la, A kohol ura sha u nôôn sha tar, A ne toho u mende sha iwo,

⁹A ne ishôso kwaghyan u i, kua ônov mba gugôô kpaa, zum u ka vea vaan la.

¹⁰Un ember sha agee a nyinya la ga, angahar a or kpaa doo Un ga.

¹¹Mba ve cie TER yô, ve doo Un ishima, kua mba ve veren asema, ve keghen erdoo Na la.

¹²We Yerusalem, wuese TER, wuese Aôndo wou, we Shion.

¹³Gadia A taver uishindan mba ucivir mba ihindagar you, A ver ônov ou ken a we doo doo;

¹⁴A na bem ken tar wou cii, A na u iyiav mbi hemban doon, kuma u gbing gbing.

¹⁵A tindi imo Na shin tar, mkaanem Nam ma zan fefa je.

¹⁶Ka A haa senou er aive a iyôngo nahan, ka A tsenda avure a a kôrough sha wuhe la er ka mtwem nahan.

¹⁷Ka A kende mngerem Nam ma ma kôrough sha wuhe la kera, er ka avurakaa nahan; ka an je nana cihi á tile hen mndorom Nama?

¹⁸Ka A tindi mkaanem Nam ma va sough ve, A er ahumbe Na, a va pever, man mngerem ma kuwa ye.

¹⁹A tesen Yakob mkaanem Nam, man Iserael kpaa akaawan a Na man ajir a Na a ôron.

²⁰Akuraior agen cii, A er a i mô nahan ga, a fa ajiraôron a Na kpaa ga. Haleluya.