Read tiv Upasalmi 27 Bible Online

Upasalmi 27 - tiv bible

Upasalmi 27

¹TER ka iwanger yam man myom wam kpaa, ka an je me cia? TER ka agee a uma wam, ka an je nana wam mciem iyolo?

²Zum u mbaerenakaabo ta sha a mo sha u vea ya inyam yam yô, —ka mbaahendanev av man mbaihomov av je la— ve nôngo gbev, ve gba.

³Shin ikumutya ia gbidye afo sha u nôngon a mo, me cia ken ishima ga; shin ityav mbia mough a mo kpaa, me taver ishima her.

⁴M sôn TER kwagh môm tsô, ka un me ker ye, mer: Ma m lu ken iyou i TER sha ayange am cii, sha u me nenge mkomashe u TER, man me time kwagh ken tempel Na kpaa.

⁵Gadia Una yerem ken ityumbe Na sha iyange i bo la, Una yerem ken iuv i tenti Na, Una kendem sha sha vande je.

⁶Hegen kpaa, kendem ityough sha, sha mbaihomov av mba ve kasem yô; man me na nagh a iember ken tenti Na, me wa icam, een, me wa atsam a wuese TER.

⁷TERE, ungwa, er m vaan genger genger yô, zungwem mhôônom, rumun msen wam.

⁸Ishima yam ngi ôron kwagh Wou er: Ker nen ishigh Yagh. Ka ishigh You je me ker ye, TERE.

⁹De yeren mo ishigh You ga, de huren wanakiriki Wou sha iyugh kera ga; ka We je U lu u wasen mo ye, de tem kera ze, de undun mo ga, Aôndo u myom wam!

¹⁰Gadia terem man ngôm undum, kpa TER Una tôôm.

¹¹TERE, tesem gbenda Wou, hemen mo sha gbenda u shambe shambe kpaa, sha ci u mbaihomov av.

¹²De nem sha awashima u mbaahendanev av ga; gadia mbashiada mba aiev mough num a mo kua mba ve ee sha num tsuen tsuen kpaa.

¹³M na jighjigh mer me nenge mdoom ma TER ken tar u mbaumav.

¹⁴Kegh TER, lu dông, ishima you i̱ taver; een, kegh TER. Ka Pasalmi u Davidi