Read tiv Upasalmi 34 Bible Online

Upasalmi 34 - tiv bible

Upasalmi 34

¹Wuese TER sha hanma shighe cii; iwuese Na ia lum ken zwa gbem.

²Ka ken TER uma wam a te ihagh ye; mbaasemaleghlegh ve̱ ungwa man i̱ saan ve iyol.

³Kehe nen iti i TER a mo imôngo; sé kende nen iti Na sha imôngo.

⁴M ker TER, A ungwam, A maa A dughum ken mciem am cii.

⁵Ve kenger Un, nahan ishigh vegh engem, vea va ahenge kpaa ga.

⁶Icanor ne yila, TER ungwa un je, A yima un sha atsan a na cii.

⁷Ortyom u TER ka a haa afo a wa mbacian Un atô, a yima ve kpaa.

⁸Bende, nenge nen, TER ka u doon je; saan or u nan suur sha a Na la, iyol.

⁹Cia nen TER, ne uicighan Nav, gadia kwagh banen mba ve cie Un la ga!

¹⁰Agumabegha je kpaa kwagh ka a ban a, ijen i kôr a; kpa mba ve keren TER yô, ma kwagh u dedoo una ban ve ga.

¹¹Va nen, ne mbayev, va ver nen ato her a mo; me tese ne u cian TER.

¹²Ka anti je uma a sar nan, man nan soo u tsan sha won, sha er nana nenge a akaa a dedoo?

¹³Kura zwa wou u̱ de er kwaghbo ga, man ityumbuzwaagh you kpaa, i̱ de er kwagh u icughugh ga.

¹⁴De ifer, eren akaa a dedoo, ker bem, zenda un ityô kpaa.

¹⁵Ashe a TER nga sha mbaperapera, A kegh ato sha u ungwan myer ve kpaa.

¹⁶TER tsughur ishigh a mbaerenkwaghbo, sha u Un a tim m-umbur u ma i umbur ve sha won la kera yô.

¹⁷Ve yila; TER ungwa ve, A dugh ve ken atsan a ve cii.

¹⁸TER ngu ikua a mba asema a vihin ve la, yem mba ve lu a ishima i zamber yô.

¹⁹Atsan a orperapera ngee, kpa TER ka A dugh nan ken a cii.

²⁰Ka A kura akuhe a nan cii, môm môm kpaa u sombo ga.

²¹Kwagh u bo una wua mbaaferev; man shi mba ve ker mbaperapera ihom yô, á na ve ibo.

²²TER ngu paan uma u mbayev Nav; mba ve suur sha a Na cii yô, á na ve ibo ga. Ka Pasalmi u Davidi