Read tiv Upasalmi 37 Bible Online

Upasalmi 37 - tiv bible

Upasalmi 37

¹Ishima i̱ de vihin we sha ci u mbaerenakaabo ga, man shi de tem kwagh u mbaerenafer la kpaa ga;

²gadia ka ve uma kera fese er toho nahan, ve use er ahu a ndor yô.

³Suur sha TER, eren akaadedoo, tema ken tar la, dondo sha kwagh u mimi.

⁴I̱ saan we iyol ken TER, man Una na u asaren a ken ishima you ye.

⁵Wa TER gbenda wou sha ikev, suur sha a Na, Una er sha mi vough.

⁶Una er perapera wou, una due ken igbar er iwanger yô, mimi wou kpaa una lu er iyange ka ia lu sha tembe nahan yô.

⁷Tema gir gir sha ishigh ki TER, ver ashe sha a Na sha ishima i wan; ishima i̱ de vihin we sha ci u or u nan zough a mkpeyol sha gbenda u nan, u nan eren atseregh la, ga.

⁸De ishima i nyoon, de iyugh; ishima i̱ de vihin we ga, ka u nan or, ifer i eren tsô.

⁹Gadia á va tim aferaior kera; kpa mba ve veren ashe hen TER yô, ka ve vea ya dyako u tar ye.

¹⁰Gadia shi côhin tsô iferor á kera lu ga; mimi je, ú nenge sha ijiir i nan, nan nan kpaa, nana lu ga.

¹¹Kpa mbaasemaleghlegh yô, vea ya dyako u tar, á saan ve iyol sha mngee u bem.

¹²Iferor henen akaabo a nana er orishôôgh yô, ka a nyuma tsombo a nan.

¹³TER Una se nan, gadia A nenge shighe u nan ngu van.

¹⁴Mbaaferev tsuwa sanker, ve henda mbaada vev, sha u vea gbihi icanor man oribanave inya, vea wua mba ve zenden jighilii yô.

¹⁵Sanker ve una kuma asema a ve ayol a ve; mbaada vev kpaa á kever ve kera.

¹⁶Guda kwagh u côhin u orperapera nan lu a mi a mngee u akaa a mbaaferev mba kpishi ve lu a mi la.

¹⁷Gadia akaseaveegh a mbaaferev aa sombo, kpa TER yô, ka A tuur mbaperapera;

¹⁸TER fa ayange a mba ve lu jighilii, dyako ve una lu gbem;

¹⁹vea va ahenge sha iyange i bo ga, sha ayange a ijen kpaa kwagh á kuma ve gbing gbing.

²⁰Kpa mbaaferev yô, vea tim; mbaihomov mba TER kpaa vea lu er mhem u toho, vea kar kera—vea kar kera er mnyim nahan.

²¹Iferor ka nan ya injô, nan kimbi ga, kpa orperapera yô, mhôônom ma ker nan, ka nan gba nan tsô.

²²Gadia mba A ver ve doo doo la, vea ya dyako u tar, kpa mba A we ve ifan la yô, á gber ve kera.

²³Ka TER A taver zende u or ye, ka i doo Un a gbenda u nan kpaa;

²⁴shin nana gba kpaa, nana gbidye inya ga, gadia TER kôr nan sha uwe.

²⁵Ngise m lu iyev, hegen m bee iyol, nahan kpaa, mayange m ngu a nenge i ta orperapera kera ga, shin tsombor u nan kpaa u sônon kwaghyan ga;

²⁶iyange jimin cii nan eren kwagh sha mhôônom ma zungwen, nan pwaren kwagh, tsombor u nan kpaa ua lu a iveren.

²⁷De ifer, eren akaadedoo, nahan ú lu gbem sha won.

²⁸Gadia kwagh u mimi doon TER ishima, man shi te mba i doo Un a ve la kera ga. Mba koson ve gbem, kpa tsombor u mbaerenafer yô, á tim ve kera.

²⁹Mbaperapera vea ya dyako u tar, vea lu ken u gbem.

³⁰Zwa u orperapera ngu er kwagh sha kwaghfan, nombor u nan kpaa, ngu er kwagh u mimi.

³¹Tindi u Aôndo u nan ngu nan ken ishima; zende u nan cii kpaa ua dolough ga.

³²Iferor dughun ashe sha orperapera, keren un a ku;

³³TER Una de un a̱ hingir sha ikev i nan ga; man shi Una rumun er a̱ na un ibo zum u á ôron un ijir la kpaa ga.

³⁴Ver ashe hen TER, wa iko sha gbenda Na, tsô Una kende u sha, ú ya dyako u tar, ú nenge mtim u á tim mbaaferev kera yô.

³⁵Lu m nenge iferor a zegeutaha sha ikev, lu samber er kon u ndor hen tar u u yô,

³⁶kpa or va karen her yô, nenge, kera lu ga! M ker un je, kpa i fatyô u zuan a na ga.

³⁷Ver ishima sha or u vough, shi nenge sha or u mimi kpaa, gadia injar ngi sha ci u or u bem;

³⁸kpa mbaasorabo yô, á tim ve imôngo icin i môm, á tim tsombor u mbaaferev kera.

³⁹Kpa myom u mbaperapera yô, due hen TER je, ka Un A lu garutya ve sha iyange i mzeyol ye.

⁴⁰TER wese ve, shi wer ve, wer ve sha ikev i mbaaferev, yem ve, gadia mba yeren her a Na. Ka Pasalmi u Davidi sha nagh ku m-umbur