Read tiv Upasalmi 49 Bible Online

Upasalmi 49 - tiv bible

Upasalmi 49

¹Ungwa nen kwagh ne, ne akuraior cii! Ver nen ato, ne mba ne lu sha won cii,

²ne mba ne lu a icivir ga, man mbaciviriv kpaa, mbanyarev kua mbaatsanev imôngo cii.

³Zwa wam ua ôr kwagh sha kwaghfan, mhen u ken ishima yam kpaa, una lu sha mkav.

⁴Me ver ato sha kwaghôron u injakwagh, me pase kikya wam sha molo.

⁵Inja na nan man me cia sha ayange a bo, zum u ifer i mba ve tevem a ican la, i kasema?

⁶Ka mba ve suur sha inyaregh vegh je la, ve ta ihagh sha inyaregh vegh ki ngeen la.

⁷Or u nan fetyô u paan anngô u nan, nan ngu je ga, shin u nan Aôndo kwagh u á paa nan a mi kpaa ga,

⁸—gadia mpaa u uma ve taver ishe tsô, yina gbem sha won—

⁹sha u ma nan lu uma gbem, ma nan nenge a ijiir i mtim ashe ga yô;

¹⁰gadia nan nengen mbafankwagh mba kpen, ibumeor man or u tumbuluu ka ve saa ishe imôngo, ve gema ve undu mbagenev a inyaregh vegh.

¹¹Mhen ve u ken asema yô, mba henen er uya vev vea tsôr gbem, ayou a ve kpaa aa lu her sha ikov ikov; ve tôô ati ve, ve gema ve ii sha ityar ve.

¹²Kpa or a icivir i nan la cii, nan tem gbem ga, nan ngu er ishôso i saan ishe nahan.

¹³Ungun ka gbenda u mba ve suur sha ayol a ve, vea za sha mi yô, kua mba ve dondo ve ityô, ve rumun mkaanem vem la kpaa. Sela.

¹⁴I ver ve sha ci u Sheol, er ka iyôngo nahan, ku ua lu orkuran ve; mbaperapera yô, vea tema tor sha a ve pepe; mdooashe ve kpaa, Sheol una kar a mi kera, sha er vea kera lu a ijiir i teman ga yô.

¹⁵Kpa Aôndo Una paa uma wam sha agee a Sheol, gadia Una tôôm. Sela.

¹⁶De cie zum u orgen nan hingir ornyar, man icivir i seer hen ya u nan la, ga,

¹⁷gadia shighe u nana kpe yô, nana yem a ma kwagh ga, icivir i nan kpaa ia za a nan ityô ga.

¹⁸Shin er nan lu uma, nan lu wuese er i kpe nan iyol —ior kpaa ve wuese we, zum u wea eren a iyol you dedoo la—

¹⁹nahan kpaa nana za hen kov u uter mba nan, mba vea kera nenge a iwanger mayange ga yô.

²⁰Kpa or u nan lu a icivir, man nan fe kwagh ga yô, nan ngu er ishôso i saan ishe nahan. Ka Pasalmi u Asav