Read tiv Upasalmi 55 Bible Online

Upasalmi 55 - tiv bible

Upasalmi 55

¹Ver ato sha msen wam, Aôndo, de yeren iyol You sha zamber wam ga.

²Ver ishima sha a mo ungwa imo yam; m hingir kera ke kera sha ishimanyian, m ngu toghor,

³sha ci u imo i orihom, sha ci u mkighir u mbaaferev; gadia mba van a akaabo sha a mo, man mba tevem a ican sha ishimanyoon.

⁴Ishima ngi yinan mo ken vanger tsung; mcieryol u kuugh kpaa ta sha a mo.

⁵Mciem tam iyol, ikarikase kpaa gbidyem iyol, cier mo iyol tsung.

⁶Zan zan m kaa mer: Ma m lu a akper er atii nahan; ma m purugh, ma m yem pe gen, ma i za kpem iyol.

⁷Ma m yem ijiir igen i caa, ma m za lu ken taaikôngo je. Sela.

⁸Ma m er fefa, ma m ker ijiir i yeren zegeahumbe man uraahumbe.

⁹Nzughul a ve Tere, pav ve ijô, gadia m nenge kwagh u aperagh man num ken gar la.

¹⁰Tugh man tetan mba zenden ningir sha ugil nav, ifer man kwaghbo kpaa mba keregh.

¹¹Mtim ngu ken atô na, mkighir man icugh mba been hen tembe na ga.

¹²Gadia lu orihom nan heem ga; gayô, ma m taver ishima; shin lu or u kôron mo ihom man nan gengese iyol sha a mo kpaa ga, gayô, ma m yer un;

¹³kpa lu we, orkwav wam je, ikyarem je, man ijende yam kpaa!

¹⁴Se lu ishima i môm sha mhen wase, se zenden imôngo a ikpelaior ken iyou i Aôndo.

¹⁵Ku u̱ bul ve fefa, ve̱ sen ve̱ nyôr shin Sheol uma, gadia iferkwagh ngi ken ya ve, ken asema a ve kpaa.

¹⁶Kpa mo yô, m ngu yilan Aôndo, TER Una yimam.

¹⁷Iyange i been man pepe man iyange sha tembe m vaan m toghor; A ungwa imo yam kpaa.

¹⁸A yima uma wam sha bem je, ken ityav mbi mbi mough a mo la, gadia mba ve lu num a mo yô, ve ngee kpishi.

¹⁹Aôndo ungwa, Una er ve ican; —Un u A tem tor gbem la— Sela. Gadia ve mba ior i geman kposo ga, mba cie Aôndo kpaa ga.

²⁰A naregh ave na sha u una er num a mba ve lu bem a na yô, a vihi ikuryan na;

²¹zwa na leghem er ka ahôm a bua yô, kpa ishima na yô, ka ityav tseegh; akaaôron na hemba leghem a mkurem, nahan kpaa ka usanker mba i tsough yô.

²²Haa akaa a zan we iyol cii sha TER, tsô Una taver we; Una rumun er i̱ tenger a mbaperapera mayange ga.

²³Kpa We, Aôndo, Ú sen a ve shin ihungwa i mtim ior mba haan awambe man mba wan atseregh yô, vea kporom a ayange a uma ve ken hemen ga. Kpa mo yô, me suur sha a We. Ngun ka sha ci u orhemen u mbawanatsam, i ver un sha imo i: Ikungugh ki hen ikon i terebin ken ca. Ka Pasalmi u Davidi. Ka icam i a dugh zum u Mbafiliti kôr un ken Gati la