Read tiv Upasalmi 71 Bible Online

Upasalmi 71 - tiv bible

Upasalmi 71

¹TERE, ka sha a We m suur ye, de rumun m̱ va ahenge mayange ga.

²Yimam sha perapera Wou, warem kpaa; ver ato Ou her a mo, yimam,

³lum vande u teman ker, henpe me zer nyôron gbem yô; ka We U kaa Wer, m̱ war ye, gadia ka We U lu barwo wam man garutya wam kpaa ye.

⁴Aôndo wam, dughum sha ikev i iferor kera, sha ikev i or u lun a perapera ga, ipiraor.

⁵Gadia ka We je U lu ishimaverenkeghen yam ye, Terem, AÔNDO ka sha a We m suur ye, hii er m lu iyev la je.

⁶Ka sha a We m suur ye, hii sha mmar je, ka We U dugh a mo ken iyav mbu ngôm ye, me wuese We gbem.

⁷Mo yô, m ngu er ka kwagh u kpilighyol hen ior kpishi yô; kpa ka We U lu ijiir yam i waren ker ye.

⁸Zwa wam iv a iwuese You, man a icivir You kpaa, iyange jimin cii.

⁹De tem kera sha shighe u iyolibeen la ga, de undun mo shighe u agee am a bee la ga.

¹⁰Gadia mbaihomov av, mba ôron kwagh sha a mo, man mba ve ker uma wam a ku kpaa, ve zua zwa,

¹¹ve kaa er: Aôndo ta un kera ve; zenda nen, za kôr nen un, gadia kera ngu a oryiman ga.

¹²Aôndo, de gbe ca a mo ga. Aôndo wam, er fefa, va wasem.

¹³Mba ve hendan a uma wam cii, ve̱ va ahenge, ve̱ saa ishe; man mba ve keren mo a ican kpaa ilyahan man kunya u̱ cir ve iyol.

¹⁴Kpa mo yô, me ver ishima me kegh gbem, me seer a seer wuese We.

¹⁵Zwa wam ua shi ôron kwagh u perapera Wou didi, man u myom Wou, gadia m fa iyenge ve ga.

¹⁶Me va a aeren a ageegh a Ter AÔNDO; me ter perapera Wou, á lu u Wou la tseegh.

¹⁷Aôndo, hii yev wam je, U tesem; zan zan ahegen yô, m ngu pasen aeren a Ou a kpilighyol her.

¹⁸Een, zan zan shighe u m bee iyol, m mende ivu kpaa, de undun mo ga, Aôndo, saa me kar pasen agee a Ou hen kov u ua va la, man tahav Ou kpaa hen hanma or u nana va lu la.

¹⁹Perapera Wou ar Sha je, Aôndo; We u U er akaa a vesen, Aôndo, ka an nan lu er We?

²⁰We u U tesem atsan kpishi a nyoon iyol, Ú shi Ú hidem a uma wam her, shi Ú dughum shin aiv a taregh.

²¹Seer mo icivir, gema, surum ishima.

²²Nahan mo kpaa me wuese We sha adiguve, ka mimi Wou je la, Aôndo wam. Me wa U atsam a wuese sha adiguve u vesen, We, Icighan u Iserael.

²³Zwa wam ua ember tsung je zum u me wa atsam a wuese We yô, kua uma wam u U paa un la kpaa.

²⁴Nombol wam kpaa ua shi teren perapera Wou iyange jimin cii; gadia mba ve keren mo a ican la yô, ve va ahenge, kunya u kôr ve cii. Ka Pasalmi u Solomon