Read tiv Upasalmi 72 Bible Online

Upasalmi 72 - tiv bible

Upasalmi 72

¹Aôndo, na tor ajiraôron a Ou, na wan u tor perapera Wou.

²A̱ ôr ior Ou ijir sha perapera; mbaatsanev Ou kpaa sha mimi.

³Iwo i̱ va ior a bem, kua agungu kpaa, sha perapera.

⁴A̱ ôr ijir i atsanaior, a̱ yima ônov mba mbaibanave, a̱ gema a̱ her ipiraor.

⁵Ve̱ cia u er iyange i lu her yô, man shighe u uwer u lu her kpaa zan zan sha ikov ikov cii.

⁶A̱ lu er ura u u nee sha toho u i tende u yô, man er iura i nôôn shin inya yô.

⁷Sha ayange na yô, i̱ kpe orperapera iyol, man bem a̱ ngee zan zan uwer ua kera lu ga.

⁸A̱ tema tor, hii hen zegemnger zan zan za ar hen zegemnger, man shi hii hen Ifi zan zan ar sha akighir a tar.

⁹Mba ve tem ken taaikôngo ve̱ gure un inya, mbaihomov nav ve̱ ndiar vuulevu.

¹⁰Utor mba Tarshishi man mba ken ityar i shin kpe zegemnger ve̱ va un a iwua; utor mba Sekeba man Seba kpaa ve̱ va a uiwua.

¹¹Utor cii vea gure un inya; akuraior cii aa er un tom.

¹²Gadia una yima oribanave zum u nana vaa yô, man icanor kua or u nan lu a orwasen ga kpaa.

¹³Mhôônom maa kôr un a mbaatsanev man mbaibanave, una yima uuma mba mbaibanave kpaa.

¹⁴Una paa uma ve sha mkighir man ipila; awambe a ve aa lu kwagh u injaa sha ishigh nagh.

¹⁵Ma a lu uma, ma i ne un zenaria u Sekeba; ior ve̱ er msen sha ci na gbem, ve̱ shi veren un doo doo didi.

¹⁶Iyiav mbi̱ ngee shin tar sha ityouv mbi iwoov je kpaa, asagher a mbi a̱ hingir war war er Lebanon yô, ior ve̱ hôm ken agar er toho u menden hen inya yô.

¹⁷Iti na i̱ lu gbem sha won, iti na i̱ samber er iyange i lu her ne, ior ve̱ ver ayol a ve doo doo ken a na, ve̱ wuese un er ka or u sar sar.

¹⁸I̱ wuese TER, Aôndo, Aôndo u Iserael, ka Un tseegh A eren akaakpilighyol ye,

¹⁹man shi i̱ wuese iti Na i dion tsung gbem sha won; tar cii u̱ iv a iengem Na. Amen, man shi Amen kpaa.

²⁰Mbamsen mba Davidi wan u Yese, ka mkur ve je ne. Ka Pasalmi u Asav