Read tiv Upasalmi 73 Bible Online

Upasalmi 73 - tiv bible

Upasalmi 73

¹Mimi je, Aôndo eren dedoo a Iserael, a mba ve lu a asema a wang yô.

²Kpa mo yô, shi kpuaa tsô angahar a am ma a kera lu ga, shi kpuaa tsô angahar a am ma a dolough kera.

³Gadia m lu tômon kwagh u mbaihaghev, zum u m nenge ikôl-laghen i mbaaferev la yô.

⁴Gadia ma kwagh u vihin tseren ve ga, ayol a ve taver gbong gbong.

⁵Ican eren ve er ior mbagenev nahan ga, man shi kwagh u bo te sha a ve er ior mbagenev nahan kpaa ga.

⁶Ka nahan man iyolgengese i har ve sha mon er ishiligh nahan ye, ipila cir ve iyol er ka ikondo nahan.

⁷Ashe ve nga ikôl ngbôô sha ci u mkehem, msenge u ve sengen ken asema a ve iv je haa inya.

⁸Mba nahan tar, man shi mba er kwagh u ifer, mba er kwagh sha mkighir sha gesa u tan.

⁹Zwa ve ngu hendan a Usha, nombor ve yô, ngu gem ngu zenden shin inya.

¹⁰Ka nahan man ior ve hir heen ye, man mba sughur man mngerem ma kpishim.

¹¹Ka ve kaa er: Á er nan man Aôndo Una fa? Man kwaghfan ngu hen Uhembansha kpa?

¹²Nenge, kape mbaaferev ve lu je ne; nahan kpaa, er kwagh a ze ve iyol ga yô, ve seer inyaregh vegh.

¹³Mimi je, m gbe wanger ishima yam, man m nyian ishô iyol gbilin tsô.

¹⁴Gadia ka m shi yan ican didi, kua mtsaha kpaa hanma sev.

¹⁵Aluer mea kaa mer: Kape me kaa ne yô, ma m er vough a kov u ônov ou ga.

¹⁶Zum u m gba nôngon u me fa kwagh ne yô, gema lum kwagh u zan iyol,

¹⁷zan zan m nyôr ken icighanjiir u Aôndo, man m nenge mkur ve ye.

¹⁸Mimi je, U ver ve ken ajiir a lyemen, U gbihi ve ken mtim.

¹⁹Nenge, er ve yôhôl, fefa yô, ve saa doo doo sha akaa a tan mciem iyol!

²⁰Er mnyam ma cien ma lu nahan, zum u or ka nan nder kera la, kape, Tere, zum u U mough sha yô, U laha mlu ve la.

²¹Zum u ishima lu vihin mo, man shi sôôm ken ishima kpaa yô,

²²m hingir ibumeor u lanen kwagh, m lu er inyamtoho nahan sha ishigh You.

²³Nahan kpaa m ngu a We gbem, U kôrom sha uwegh agh ku yanegh.

²⁴Ú hemen mo sha mhen Wou, ken masetyô yô, U ngohol mo, Ú za a mo ken icivir.

²⁵Ka an m lu a mi Sha, saa We tseegh gaa? Man ma kwagh u a sarem sha tar ngu ga, saa We.

²⁶Shin iyol yam kua ishima yam vea taver ga kpaa, Aôndo ngu agee a ishima yam man kwar wam gbem sha won.

²⁷Gadia nenge, mba ve lu ica a We yô, vea saa ishe; Ú tim mba ve undu U cii sha idya i eren yô.

²⁸Kpa mo yô, doom u mgbôghom a Aôndo; m gema Ter AÔNDO hingir mo ijiir yam i yeren ker, sha er me ôr kwagh u aeren a Ou cii yô. Ka ityesen i Asav