Read tiv Upasalmi 78 Bible Online

Upasalmi 78 - tiv bible

Upasalmi 78

¹Ne ior av, ver nen ato sha ityesen yam, kegh nen ato sha akaaôron a ken zwa wam ne.

²Me bugh zwa wam me ôr injakwagh, me ôr ukikya mba tsuaa la,

³akaa a se ongo man se fe kpaa, uter asev kpaa lu kaa se.

⁴Sé yer ônov vev a ga, sé ôr kov u u ve la kwagh u iwuese i TER kua agee a Na cii, man ityom Na i kpilighyol i A er yô.

⁵Gadia A ver shiada ken Yakob, A wa tindi ken Yakob, u A ne uter asev, sha er ve̱ tese ônov vev, ve̱ fa yô;

⁶sha er kov u u ve la ua fa yô, ka ônov mba á va mar je la, ve di kpaa vea gema á ôr ônov vev;

⁷sha er ve̱ ver asema a ve sha Aôndo, ve̱ de hungul ityom i Aôndo ga, kpa ve̱ waan atindi a Na iko,

⁸ve̱ de kera luun er uter vev ga, kov u taver ityough u henda kwagh, kov u tilen a ishima i u vough ga, u ishima i u i lu jighilii a Aôndo ga la.

⁹Ônov mba Eferaim, mba ve lu a mbaada kua avaan ve gema ijime sha iyange utya.

¹⁰Ve wa iko sha ikuryan i Aôndo ga, ve lumun u zenden sha atindi a Na kpaa ga,

¹¹ve hungul aeren a Na, man akaa a Na a kpilighyol a A tese ve a yô.

¹²A er akaacieryol sha ashe a uter vev, ken tar u Igipiti ken toho u Soan.

¹³A pav zegemnger, A per a ve, A er mngerem ma tile er tihi nahan.

¹⁴Tetan A hemen ve sha ibeen, tugh cii yô, i gema i lu sha iwanger i usu.

¹⁵A pav avande ken desereti, A na ve mngerem, ve ma wuee er ka shin iv yô.

¹⁶A er mngerem due ken vande kuwa, A er mngerem kuwa er ka uifi nahan.

¹⁷Nahan kpaa ve zer eren Un asorabo, ve lu hendan a Uhembansha ken tar u iombor.

¹⁸Ve mee Aôndo ken asema a ve sha u pinen kwaghyan sha mtôm ve la.

¹⁹Een, ve ôr kwagh a Aôndo sha mhendan, ve kaa er: Aôndo Una fatyô u yôron se iwer ken desereti kpa?

²⁰Nenge, A gbidye vande, tsô mngerem due kpishi, uikuwan sar avenge; Una shi á fatyô u nan ruam kpaa? Una na ior Nav inyama?

²¹Ka nahan man TER ungwa, ishima nyoon Un ye; i keer usu u ver tswam a Yakob, iyugh kpaa ta sha Iserael;

²²gadia ve na Aôndo jighjigh ga, man shi ve suur sha iwasen Na kpaa ga.

²³Nahan kpaa A wa ikwavaôndo kwagh Sha, A bugh ihinda i Usha,

²⁴A haa ve mana, er ura ka ua nôôn nahan, sha u ve̱ ya yô, A na ve iyiagh ki Shaagh.

²⁵Hanma or nan ya ruam u mbaageev; A tindi ve a kwaghyan kuma ve je.

²⁶A er ahumbe a sha ityoughkitaregh hura Sha; ka sha agee a Na A tese ahumbe a ken imbusutariyan gbenda u zan ye;

²⁷A haa ve inyam er vuulevu yô, man inyon i akperegh er waarawa u uzegembamngerev nahan;

²⁸A er i i gba haan her atô u afo ve, kase ajiir a ve a teman la.

²⁹Tsô ve ya kuma ve gbing gbing; A na ve sha isharen ve la.

³⁰Isharen ve la lu a bee ga, er ve lu a kwaghyan zwa la je,

³¹tsô iyugh i Aôndo mough sha a ve, A wua mba ve hemba taver iyol la, A haa ikaior i Mbaiserael inya.

³²Nahan kpaa ve seer a seer isholibo; jighjigh tsô, kpaa, ve na sha akaa a Na a kpilighyol la ga.

³³Nahan A er ayange a ve saa kera er humbe nahan, anyom a ve kpaa saa kera sha mcie.

³⁴Er A wua ve yô, zum la ve pine Un, ve gema ishima ve ker Aôndo.

³⁵Tsô ve umbur er Aôndo A lu vande ve, man Aôndo Uhembansha A lu Orpaan ve je yô.

³⁶Kpa ve bume Un sha zwa, ve tsugh Un sha nombor ve.

³⁷Gadia ishima ve var ken a Na ga, ve lu veren asema sha ikuryan Na kpaa ga.

³⁸Kpa Un yô, er mhôônom kôr Un yô, A de ve ifer ve, A tim ve ga; een, acin imôngo je A de ishima Na i vihin, A kera kpoghol iyugh Na cii ga.

³⁹A umbur er ve lu ior tsô, ahumbe a karen kera, hilen ga.

⁴⁰Kpash! Ve hendan a Na ken desereti, acin imôngo je, ve vihi Un ishima ken toho;

⁴¹ve shi ve mee Aôndo, ve bam Icighan u Iserael.

⁴²Ve umbur agee Na ga, shin iyange i A paa ve sha ikev i orahendanegh la kpaa ga,

⁴³zum u A er uivande Nav ken Igipiti, man akaa a Na a kpilighyol ken toho u Soan la,

⁴⁴man er A gema uifi vev hingir awambe, kua iwagh ve kpaa, je ve kera fatyô u man ga la.

⁴⁵A tindi ikpila i akughô her a ve a a ya ve, kua asôhô kpaa, a a tim ve.

⁴⁶A na iyiav vev, igyer ya; tom ve u ican kpaa, ikomon ya.

⁴⁷A vihi ve ikon i wain sha awombo, kua ikon i tur vev kpaa sha avure a a korough sha wuhe.

⁴⁸A na awombo wua uzendenya vev; man ilev vev kpaa, inyiar gba sha mi.

⁴⁹A haa ve iyugh Na i vihin, ishima i nyoon man ishima i vihin i cieryol, ka ikum i mbatyomov mba bov je la.

⁵⁰A bugh iyugh Na gbenda; A kera tsegha uma ve ken ku ga, kpa A gbihi uma ve ken bouange.

⁵¹A wua hanma waniunda ken Igipiti, ka mhii u agee a ve, ken tenti u Ham je la.

⁵²A due a ior Nav er ka iyôngo nahan, A hemen ve ken desereti er ikumuile nahan.

⁵³A hemen ve gbenda doo doo, er vea kera cia ga yô; kpa zegemnger uve a mbaihomov vev.

⁵⁴A va a ve hen tar u icighanjiir Na a lu her la, hen uwo u uwegh Nagh ku yanegh ngohol la.

⁵⁵A zenda akuraior sha ishigh vegh kera kpaa, A kar ve dyako sha a; A er ikwe i Iserael tema ken utenti vev.

⁵⁶Nahan kpaa ve mee Aôndo ve hendan a Na, Un Uhembansha la; ve kera wa mbampase Nav iko ga,

⁵⁷kpa ve hide ijime, ve er sha icugh, er uter vev nahan, ve hure er ada u bo nahan.

⁵⁸Gadia ve bam Un sha ajiir a ve a taven sha la; ve kpoghol iwuhe Na sha ieev vev mbi gban la.

⁵⁹Zum u Aôndo ungwa nahan, ishima vihi Un tsung, maa A ta Iserael kera eleghee je;

⁶⁰A undu tabernakel u ken Shilo, tenti u A tim hen atô u ior la.

⁶¹A na agee a Na ken uikangen, man iengem Na kpaa ken ikev i or u ahendanegh.

⁶²A na ior Nav sha ikev i sanker; ishima vihi Un tsung a dyako Na.

⁶³Usu hia ikaior ve; mbayev vev mba kasev kpaa i kera wa ve icam i sha kwaseeren ga.

⁶⁴I wua upristi vev sha sanker; kasev mba côgholov vev kpaa, vaa ku ga.

⁶⁵Tsô Ter nder er ka or u nan nder mnya nahan, man er orageegh u msôrom ma ker nan nan genger imo yô.

⁶⁶A gbidye mbaahendanev Nav, A hide a ve ijime, A er, i hee ve gbem.

⁶⁷A venda tenti u Yosev, A tsuwa kwe u Eferaim ga,

⁶⁸kpa A tsuwa kwa u Yuda, uwo u Shion u u doo Un ishima la.

⁶⁹A maa icighanjiir Na er Sha u a gbe ca la nahan, man er tar u A ver u u lu gbem nahan.

⁷⁰A tsuwa Davidi, wanakiriki Na, A tôô un ken akumauile;

⁷¹A tôô un henpe lu kuran ungômbaiyôngov mba lun a ônov, A va a na, er a̱ va koso nongo Na Yakob kua dyako Na Iserael.

⁷²Nahan a koso ve di sha inja i mimi u ken ishima na je, a hemen ve sha kwaghfan u sha ave na la. Ka Pasalmi u Asav