Read tiv Upasalmi 86 Bible Online

Upasalmi 86 - tiv bible

Upasalmi 86

¹TERE, shir ato Ou, ungwa imo yam, gadia m ngu icanor man oribanave.

²Kura uma wam, gadia m ngu or u cian Aôndo je; We Aôndo wam, yima wanakiriki Wou u a suur sha a We yô.

³Tere, zungwem mhôônom, gadia m zeren yilan We iyange jimin cii.

⁴Na, i̱ saan wanakiriki Wou iyol; gadia Tere, ka sha a We m veren ishima yam ye.

⁵Gadia We, Tere, U doo, U kegh iyol u den kwaghbo, erdoo Wou ngee a mba ve yer sha iti You cii.

⁶TERE, ver ato sha msen wam, ungwa imo i uzamber av.

⁷Sha iyange i ican i tserem yô, me yila U, gadia Ú ungwam.

⁸Tere, ma Aôndo u lun er We nahan kera ngu ga, ma ityom i i kom sha i You kpaa ngi ga.

⁹Tere, akuraior a U er cii, aa va, aa va gure U inya, aa civir iti You kpaa.

¹⁰Gadia U hemba, U eren akaa a kpilighyol; ka We tseegh U lu Aôndo ye.

¹¹TERE, tesem gbenda Wou, sha u me zende ken mimi Wou; sôr ishima yam i̱ hingir i môm sha u cian iti You.

¹²Tere, Aôndo wam, me wuese We a ishima yam cii; man shi me civir iti You gbem kpaa;

¹³gadia erdoo Wou vese hen a mo, U dugh uma wam shin atô u Sheol je.

¹⁴Aôndo, mbaihaghev mough num a mo, ikum i mbaaperav ngi keren mo a ku, ve ver U sha ishigh vegh ga.

¹⁵Kpa We yô, Tere, U ngu Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je.

¹⁶Gema her a mo, zungwem mhôônom, na wanakiriki Wou agee Ou, yima wan u wanye Wou u kwase.

¹⁷Tesem ikav i sha kwagh u doon, sha er mba ve kerem ihom ve̱ nenge, ve̱ va ahenge; gadia We, TERE, U wasem, man U surum ishima kpaa yô. Ka Pasalmi u ônov mba Kora. Ka icam