Read tiv Upasalmi 89 Bible Online

Upasalmi 89 - tiv bible

Upasalmi 89

¹Me wa icam, me ter erdoo u TER gbem sha won; me ôr kwagh u jighjigh Wou u mimi sha zwa wam sha ikov ikov.

²Gadia m kaa mer: Á maa a maa erdoo zan zan gbem sha won; U ver jighjigh Wou u mimi sha Usha je.

³M ya ikur a u M tsough un la, M bum a wanakiriki Wam, Davidi Mer:

⁴Me ver tsombor wou u̱ lu her gbem sha won; Me maa ikônough you ki torough zan zan sha ikov ikov cii.

⁵TERE, Usha mba wuese akaa a Ou a kpilighyol kua jighjigh Wou u mimi kpaa, ken mkohol u uicighanmbaiorov.

⁶Gadia ka an nan lu Sha je, u á kar nan a TERE? man ken mbaaôndo yô, ka an nan lu er TERE?

⁷Ka Aôndo u i cie Un kpishi ken mkohol u uicighanmbaiorov, A cier iyol hen mba ve kase Un cii.

⁸TERE, Aôndo u akum a Sha, ka an nan lu a agee er We TERE, jighjigh Wou u mimi kpaa kase U.

⁹We U tema tor sha imanger i zegemnger, zum u agôndo a na ka a mough yô, U yange a, a de.

¹⁰We, U sombo Rahabi njighe njighe er or u i woo nan yô; U sambe mbaihomov Ou sha uwegh Ough ku ageegh.

¹¹Usha ka mba Ou je, tar kpaa ka u Wou; tar u sha won cii man m-iv u u kpaa, ka We U er ve, ve lu ye.

¹²Imbusutarimese man i yan kpaa, ka We U gba a ye; Tabor man Hermon mba ember ken iti You.

¹³U ngu a uwegh ku ageegh, uwegh Ough ka ku taver je, U kende uwegh Ough ku yanegh, ku sha je.

¹⁴Perapera man ijirôron i mimi, ka ve ve lu imagh ki ikônough You ki torough ye; erdoo man mimi mba zan We sha ishi.

¹⁵Mba ve fe imo i iember ne yô, saan ve iyol, mba zenden ken iwanger i ishigh You, TERE.

¹⁶Ka ken iti You man ve shi ember didi ye, shi ka ken perapera Wou kpaa i kende ve sha ye.

¹⁷Gadia ka We U lu iengem i agee a ve ye; sha mdoo u i doo U a vese yô, á kende a korough asegh sha.

¹⁸Gadia perutya wase ka u TER je; tor wase kpaa ka Icighan u Iserael la.

¹⁹Iyange U ôr kwagh a or u i doo U a na la sha mpase u sha mnenge, U kaa Wer: M ver iwasen sha or u a lu a tahav, M kende a or sha, u i tsough un ken ior yô.

²⁰M zua a wanakiriki Wam, Davidi, M shighe un icighanmkure Wam;

²¹uwegh Agh kua lu a na gbem, ikasewe Yam kpaa ia taver un.

²²Orihom á kighir un ga, wan u ifer kpaa una er un ican ga.

²³M her mbaahendanev nav sha ishigh nagh; mba ve ker un ihom yô, Me wua ve.

²⁴Jighjigh Wam man erdoo Wam vea lu a na; man shi ka ken iti Yam kpaa, á kende a korough nagh sha ye.

²⁵Man shi Me penda uwegh nagh sha zegemnger, man uwegh nagh ku yanegh sha uifi.

²⁶Una yilam er: Ka We, U lu Terem ye, Aôndo wam, man vande u myem wam.

²⁷Mo Me gema un, una hingir waniunda, u hemban utor mbagenev mba sha won cii.

²⁸Erdoo Wam una lu her sha ci na gbem sha won, ikuryan Yam a na kpaa ia lu her taveraa.

²⁹Me er tsombor na ua lu gbem, ikônough nagh ki torough kpaa, kia lu er ayange a Sha yô.

³⁰Aluer ônov nav vea undu tindi Wam, vea zaan sha iniezwa Yam ga yô,

³¹aluer vea vihin akaawan a Am, man vea waan atindi a Am iko kpaa ga yô,

³²zum la Me va tsaha kwaghbo ve sha akpa, man iferkwagh ve sha ugbidi,

³³kpa Me kar a erdoo Wam her a na kera ga, jighjigh Wam kpaa Me vihi un kera ga.

³⁴Me bunde ikuryan Yam ga, kwagh u a dughum ken zwa kpaa una gema kposo ga.

³⁵M bum a bum mtsegh Wam je, Me er Davidi aie ga;

³⁶Tsombor na ua lu gbem, ikônough nagh ki torough kpaa kia lu sha ishigh Yagh er ka iyange yô;

³⁷kia taver her gbem, er uwer nahan, orshiada u Sha ka u mimi je. Sela.

³⁸Nahan kpaa U ta kera, U venda, U yuwe a or u U shigh un mkurem la;

³⁹U bunde ikuryan a wanakiriki Wou, U hôngor a idyer na i tor la, U gbihi hen inya;

⁴⁰U yôhôl uigyar nav cii, U hembe ayouautya na kpaa, hingir alôgh;

⁴¹mbakaren hen gbenda cii mba vihin un akaa; a hingir kwagh u aheenegh hen mbawanndor a na.

⁴²U kende a uwegh ku yanegh ku mbaahendanev nav sha, U er mbaihomov nav ca ca ve ember tsung je;

⁴³een, U er kur u sanker na hide ijime, U taver un wer a̱ tile dông ken utya ga;

⁴⁴U kar a iengem na kera, U gbihi ikônough nagh ki torough inya;

⁴⁵U nyura un ayange a iyev nav, U cir un kunya iyol. Sela;

⁴⁶Shi nan je, TERE, man Ú de u yeren gbeme, man iyugh You kpaa ia de u yeghen er usu nahana?

⁴⁷Umbur er ayange am a ndahar yô, man er U gbe ior ve lu gbilinkwagh tsô yô!

⁴⁸Ka an or je nan lu uma, man nana nenge ku ashe ga, nana yima uma u nan sha ikev i Sheolo? Sela.

⁴⁹Tere, uerdoo Ou mba ngise la mba hana mba yan U bum a Davidi sha jighjigh Wou laa?

⁵⁰Tere, umbur mlaha u i laha mbayev Ou la, man er m tee mlaha u akuraior kpishi ken vanger wam yô,

⁵¹u mbaihomov Ou ve laha la, TERE, u ve laha angahar a u U shigh un mkurem la.

⁵²I̱ wuese TER gbem sha won. Amen man shi Amen. Msen u Mose, or u Aôndo