Read tiv Upasalmi 9 Bible Online

Upasalmi 9 - tiv bible

Upasalmi 9

¹Ngun ka sha ci u orhemen u mbawanatsam; i ver un sha inja i Mutelaben. Ka Pasalmi u Davidi Me wuese TER a ishima yam cii, me pase aeren a Ou a kpilighyol cii.

²Me ember, me ember tsung ken a We, me wa icam i civir iti You, We Uhembansha,

³gadia mbaihomov av gema ijime, ve nôngo gbev, ve gba timin sha ishigh You.

⁴Gadia U taver ishô yam man ijirôron yam; U kar U za tema sha ikônough ki torough, U ôr ijir sha mimi.

⁵U yange atôatyev, U tim mbaaferev, U kough ati a ve kera purututu.

⁶Mbaihomov saa doo doo, ve hingir dang gbem; agar a U yôhôl a la, u umbur a tsô kpaa, kera ka ga.

⁷Kpa TER yô, tem gbem; A sôr ikônough Nagh ki torough sha ci u ijirôron.

⁸Una ôr tar ijir sha mimi, Una ôr akuraior ijir vough.

⁹TER Una hingir ijiir i yeren sha ci u mba i kighir ve a ican yô, ijiir i yeren sha ayange a ican i tsung la.

¹⁰Mba ve fe iti You yô, vea suur sha a We, gadia TERE, We, U kende mbakeren We la, dang mayange ga.

¹¹Wa nen icam i wuese TER u A tem sha Shion, ôr nen akuraior kwagh u ityom Na!

¹²Gadia Wen u A oron iyev i awambe a i hee inya la, umbur ve; mliam ma mbaatsanev ma hungul Un ga.

¹³TERE, zungwem mhôônom; nenge ican yam, i m ye sha ikev i mba ve kerem ihom la, We u U kendem sha hen ihinda i kuugh ne,

¹⁴sha u m̱ pase iwuese You cii; ka ken ihinda i wankwase u Shion la, me ember myom Wou ye.

¹⁵Akuraior gba shin ihungwa i ve tim yô, ka ken kper u ve we la angahar a ve a cimin ye.

¹⁶TER gema pase iyol Na: A ôr ijir ve! Ka sha tom u ave na iyol na la, i ker iferor ye. Higayon. Sela.

¹⁷Mbaaferev vea hide shin Sheol, ka atôatyev cii a Aôndo A hungul a je la.

¹⁸Gadia á hungul mbaibanave gbem ga, ishimaverenkeghen i mbaatsanev kpaa ia saa gbem ga.

¹⁹Mough sha TERE, or a̱ de hembe ga, i̱ ôr atôatyev ijir sha ishigh You!

²⁰Ta ve mciem iyol, TERE, atôatyev a̱ fa er a lu ior tsô yô. Sela.