Read tiv Upasalmi 94 Bible Online

Upasalmi 94 - tiv bible

Upasalmi 94

¹TERE, We Aôndo u iyevoron i lu i You, We, Aôndo, u iyevoron i lu i You yô, mondo iwanger.

²Mough sha, We, Orjir u taregh; na mbagengeseyol kwagh u a kom sha a ve yô.

³TERE, shi nan je man mbaaferev, shi nan je man mbaaferev vea de u embere?

⁴Mba lamen, ôron kwagh sha imanger; mbaerenafer cii mba er kwagh sha ihagh.

⁵Mba heren ior Ou, TERE, mba kighir dyako Wou.

⁶Mba woo kwasecôghol man shiror, mba woo ancôgholov kpaa.

⁷Mba kaan er, TER nenge ga, Aôndo u Yakob kav ga.

⁸Ver nen ishima ne ior mbalanenkwagh; man ne abumeaior yô, ka hanma iyange je né fa kwagha?

⁹Wen u A we togh yô, Una ungwa ga ha? Wen u A er ishe yô, Una nenge ga ha?

¹⁰Wen u A tsahan akuraior yô, Una kera kôôm gaa— Wen u A tesen or mfe la ha?

¹¹TER fa mbamhen mba orov er i lu humbe tsô yô.

¹²Or u i saan nan iyol yô, ka or u u tsaha nan, TERE, shi U tese nan tindi Wou kpaa yô,

¹³sha er Ú na nan mmem sha ayange a mzeyol, zan zan á va time ihungwa sha ci u iferor yô.

¹⁴Gadia TER Una ta ior Nav kera ga, man Una undu dyako Na kpaa ga.

¹⁵Gadia ijirôron ia hide ken perapera; mba asema a ve a lu jighilii cii, vea za a i ityô.

¹⁶Ka an nana mough num a mbaerenakaabo sha ci wama? Ka an nana wasem nana mough num a mbaerenaferakaa?

¹⁷Ka er TER A lu orwasen wam yô, gayô, ica kpaa ma i gbe ga, tsô uma wam ma a lu ken ijiir i ving je.

¹⁸Zum u m hen mer, nguhar wam ngu dolough yô, erdoo Wou kôrom sha, TERE.

¹⁹Zum u mbamhen ve ngeem ken ishima yô, mbamsurshima Ou nam ishima i saan saan.

²⁰Ikônough ki ijirigh ki ifer kia zua nongo a We he, un u a eren ifer a gem a suur sha tindi laa?

²¹Ve zua sha u tan num sha uma u orperapera, ve na orishôôgh ibo.

²²Kpa TER gema hingir gôgôyou wam, man Aôndo wam ka vande u m yer ker yô.

²³Una hide a aferakaa a ve sha ityough vev, Una tim ve ken iferkwagh ve kera; TER, Aôndo wase, Una tim ve kera.