Read tiv Upasalmi 96 Bible Online

Upasalmi 96 - tiv bible

Upasalmi 96

¹Wa TER icam i he, wa TER icam, we, tar cii!

²Wa TER icam, wuese iti Na, pase kwagh u myom Na ayange ayange.

³Pase akuraior iengem Na, man akaa a Na a kpilighyol kpaa hen ior cii.

⁴Gadia TER hemba cii, A kuma iwuese kpishi je, A hemba cier iyol a mbaaôndo mbagenev cii.

⁵Gadia mbaaôndo mba iorov cii ka agbilinakaa tsô, kpa TER gba Usha.

⁶Icivir man iengem mba Un sha ishi, agee man mdooashe mba ken icighanjiir Na.

⁷Ne icombor i ior, na nen TER, na nen TER icivir man agee.

⁸Na nen TER icivir i i kom sha iti Na yô, va nen a nagh, va nyôr nen hen ityembe Na.

⁹Gure civir nen TER a uicighanmbaakondov iyol. Ikarikase i̱ gbidye u iyol sha ishigh Nagh, we tar sha won cii!

¹⁰Kaa a akuraior wer: TER tema tor, tar kpaa u taver je, ua kera tenger ga. Una ôr akuraior ijir sha mimi.

¹¹Usha ve̱ ember, man tar kpaa u̱ ember tsung, zegemnger a̱ hura kua m-iv na kpaa,

¹²toho u̱ ember kua akaa a a lu ken u cii; zum la ikon i ken ikô cii ia wa icam a iember

¹³sha ishigh ki TER, gadia ngu van, ngu van sha u ôron tar ijir; Una ôr tar ijir sha perapera, man akuraior kpaa sha mimi Na.