Read tiv Anzaakaa 12 Bible Online

Anzaakaa 12 - tiv bible

Anzaakaa 12

¹Or u tsaha u doo nan yô, ka mfe a doo nan ye, kpa u nan vende myange yô, nan lan kwagh.

²Ormimi yô, á doo TER a nan, kpa or u nan hen ubombaakaav yô, Una na nan ibo.

³Or a taver sha ifer ga, kpa mise u orperapera yô, ua tenger ga.

⁴Kwase u mimi nan ngu tsar u sha ityou u nom u nan, kpa u nan eren kwagh u kunya yô, nan ngu er ihôônkwagh nahan ken akuhe a nom u nan.

⁵Mhen u mbaperapera ka u mimi je, kpa mbamhen mba aferaior yô, ka icugh tsô.

⁶Kwaghôron u aferaior ka u gban gwe sha u za haan awambe inya, kpa zwa u mbaperapera yô, ua yima ve.

⁷Ka i mgbegha aferaior kera, ve kera lu ga, kpa ya u mbaperapera yô, á lu her taveraa.

⁸A wuese or sha kwaghfan u nan, kpa or u lun a ishima i dang yô, á laha nan.

⁹Guda or u i wongor nan ga, kpa nan lu a kpan, a or u nan civir iyol i nan, kpa nan lu a kwaghyan ga la.

¹⁰Orperapera we uma u zendenya na iko, kpa mhôônom ma zungwen ma iferor yô, ka tswam.

¹¹Or u nan kaha sule u nan yô, nana lu a kwaghyan kpishi, kpa or u nan zenden sha agbilinakaa yô, nan kav kwagh je ga.

¹²Kwagh u aferaior a ker ken kper la sar iferor, kpa mise u orperapera ngu um atam.

¹³Ka sha ifer i sha ityumbuzwaagh la, ka i hôn iferor i kôr nan ye, kpa orperapera nana war ican.

¹⁴Or nana mgbough a kwaghdoon, sha kwagh u injaa u a dugh sha zwa u nan la; man shi aeren a ave a or la, aa hide sha a nan.

¹⁵Sha mnenge u ibumeor yô, gbenda u nan ngu vough je, kpa or u nan ver ato sha kwaghwan yô, nan fa kwagh.

¹⁶Iyugh i ibumeor ka i due ken igbar fese je, kpa or u nan yer kunya yô, nan fa kwagh.

¹⁷Or u nan kaan mimi yô, ka perapera je nan pasen ye, kpa shiada u aie yô, ka icugh.

¹⁸Orgen ka nan gba ôron kwagh gagh er mkuma u sanker yô, kpa nombor u orfankwagh yô, ngu ne mkpeyol.

¹⁹Zwa u ôron kwagh sha mimi, ua lu gbem, kpa nombor u eren aie yô, ua lu di her dôghôô tsô.

²⁰Icugh ngi ken ishima i mbadughunifer, kpa mba ve dugh mhen u bem yô, mba a m-ember.

²¹Ma kwaghbo una tser orperapera ga, kpa iferor yô, ican ia ume sha a nan.

²²Ityumbuzwaagh i aiegh ka kwagh u ndôhôr TER ishima je, kpa mba ve eren sha mimi yô, doo Un a ve.

²³Orfankwagh ka nan yer mfe u nan, kpa ishima i abumeaior yô, ka i yôôn ibumegh.

²⁴Uwegh ku or u veren ishima sha kwagh kua ya tor, kpa or u eren hwev yô, á kighir nan sha tom.

²⁵Ishima i nyian ka i na or nan ure, kpa kwaghôron u saan saan ka a na nan iember.

²⁶Orperapera ka orhemengbenda u or u wan ndor a nan, kpa gbenda u aferaior yô, ka u na ve mtsum.

²⁷Oruhwe nan zua a inyam sha ikôl i yaren i nan ga; kpa ishima i tiaver yô, ka kwaghinjaa u or.

²⁸Sha gbenda u perapera uma ngu, kpa gbenda u ifer yô, u ver ishigh ken ku.