Read tiv Anzaakaa 14 Bible Online

Anzaakaa 14 - tiv bible

Anzaakaa 14

¹Hanma kwase u fan kwagh ka nan maa iyou i nan, kpa ibumekwase yô, ka nan yôhôl i sha ave a nan je.

²Or u nan zenden sha mimi u nan yô, nan ngu cian TER, kpa u nan lu dang sha ieren i nan yô, nan ngu lahan Un.

³Ken zwa u ibumeor yô, akpa ngu sha ci u mgengeseyol u nan la, kpa ityumbujôôgh i mbaperapera ia kura ve.

⁴Henpe abua a lu ga yô, kpese ka u lu wanger wanger, kpa sha agee a bua a kahan sule yô, mtser ka a lu kpishi.

⁵Orshiada u mimi yô, nana er aie ga, kpa orshiada u mimi ga yô, ka nan ôron kwagh sha aie.

⁶Orpuunakaa ka nan ker kwaghfan, kpa nan zua a mi ga, kpa or u nan lu a mkav yô, mfe ngu nan ican ga.

⁷Kar sha ishigh ki ibumeor kera, gadia ú ungwa akaaôron a sha mfe heregh ga.

⁸Kwaghfan u or u nan lu a mfe ngu sha ci u nana kar gbenda u nan, kpa ibumegh ki abumeaior yô, ka icugh je.

⁹Nagh ku isholibo gema naha abumeaior tar, kpa doo Aôndo a mbamimi.

¹⁰Ishima fa ican i i, iember i i kpaa, orgen fatyô u nyôron nongo a i ga.

¹¹Ya u aferaior yô, á tim un kera, kpa tenti u mbaperapera yô, una za hemen.

¹²Gbenda ugen sha mnenge u or yô, ka u lu vough, kpa mkur u u yô, ka igbenda i kuugh je.

¹³Ken ahan a sen je kpaa, ishima ka i vihi, mkur u mhen kpaa shighe ugen ka ishima i nyian.

¹⁴Or u undun gbenda u mimi nana ide sha igbenda i nan la, orinjaa di kpaa, sha kwagh u nan lu a mi la.

¹⁵Orlanenkwagh ka nan gba nan jighjigh sha hanma kwaghôron tsô, kpa orfankwagh yô, ka nan ver ishima sha zende u nan.

¹⁶Orfankwagh ka nan cian ifer, shi nan pav a i kpaa, kpa ibumeor yô, ka nan cihin kwagh, nan cian kwagh ga.

¹⁷Or u nan nyoon ishima fefa yô, nana er kwagh sha ibume; or u ayomough yô, mba vende nan.

¹⁸Mbalanenkwagh yô, dyako ve ka lanegh, kpa mbafankwagh yô, mba kange ve tsar u mfe sha ityou.

¹⁹Mbabov ka ve ngurum inya sha ishigh ki mbamimi, aferaior di kpaa sha ihinda i mbaperapera.

²⁰Icanor yô, or u wan ndor a nan je kpaa ka i kera doo nan a nan ga; kpa ornyar yô, ka nan lu a ahuraior kpishi.

²¹Or u nan lahan or u nan we ndor a nan yô, nan ngu eren kwaghbo, kpa or u mhôônom ma ker nan a mbaatsanev yô, saan nan iyol.

²²Mba ve henen ifer, ka gbenda ve tsum gaa? Kpa erdoo kua mimi vea hingir kwar u mba ve henen kwagh u dedoo.

²³Hanma tom u nyoon iyol ngu a mtser, kpa u lamen sha zwa yô, ka a na mban u akaa tsô.

²⁴Tsar u sha ityou u mbafankwagh yô, ka inyaregh vegh je, kpa ibumegh ki abumeaior yô, ka ibumegh tsô.

²⁵Orshiada u mimi ka a yima uuma, kpa or u ôron kwagh sha aie yô, nan ngu orcugh.

²⁶Sha mcie u cian TER la, ishima á taver or, ônov mba nan kpaa vea zua a ijiir i waren.

²⁷Mcie u cian TER ka imbor i uma je, sha u waren akaahônon a kuugh.

²⁸Ihagh i tor yô, ka mngee u ior la, kpa mban u ior gema ka mtim u ortaregh.

²⁹Or u nan yugh fefa ga yô, nan ngu a mkav u vesen, kpa or u nyoon ishima gagh yô, ka nan kende a ibumegh sha.

³⁰Ishima i bem bem ka uma u iyolough je, kpa iwuhe yô, ka mhee u akuhe.

³¹Or u nan nzughul a icanor yô, nan laha u A gbe nan la, kpa u nan zungu oribanave mhôônom yô, nan ngu civir Un.

³²Iferor ka nan gba sha ifer i nan, kpa orperapera yô, ka nan lu a mwar ken ku u nan je kpaa.

³³Kwaghfan tem ken ishima i orkavenkwagh, ken atô u abumeaior je kpaa, i fa nahan.

³⁴Perapera ka a kende ikurior sha kpa isholibo yô, ka kwagh u aheenegh hen ior je.

³⁵Mrumun u tor ka a lu sha or u nan eren tom sha kwaghfan yô, kpa iyugh na ka i lu sha or u eren kwagh u kunya yô.