Read tiv Anzaakaa 18 Bible Online

Anzaakaa 18 - tiv bible

Anzaakaa 18

¹Or u nan dugh iyol i nan kposo yô, ka isharen i nan iyol i nan, nan keren ye, nahan nan mough num a kwaghfan u mimi cii.

²Ibumeor nan ngu a ma iember sha mkav ga, saa di u ishima i nan ia pase iyol i i tsô.

³Zum u iferor ka una va yô, iheen kpaa i va, man sha ieren i kunya yô, ilyahan kpaa i va.

⁴Akaaôron a ken zwa u or nga er mngerem ma zan yô, ka uwagh u kuwan, man imbor i kwaghfan kpaa.

⁵U tan ken iferor, man geman nan ormimi ibo sha ijir yô, doo ga.

⁶Ityumbuzwaagh i ibumeor ka i va a ayôôso, zwa u nan kpaa u keren gbidiv.

⁷Zwa u ibumeor ka mtim u nan je, ityumbuzwaagh i nan kpaa ka ihônon i uma u nan je.

⁸Akaaôron a orangeregh nga er kwaghyan u nyohon nahan, ka a sen a nyôr shin aji ir a shin iuv je.

⁹Or u nan lu hwev sha tom u nan je yô, nan ngu anmgbian u or u timin a tim ior.

¹⁰Iti i TER ka gôgôyou u taven u taver, orperapera ka nan yevese nan ta kimi, nan war.

¹¹Inyaregh ki ornyar ka gar u nan u taver je, man ka er kpekpe u taven nahan, sha mnenge u nan.

¹²Mtim dondo sha ishima i moron i or, icivir di dondo sha mhir u iyol ijime.

¹³Or u nan kaa imo je er nan lu a ungwa ga yô, á hingir lanegh ku nan man kwagh u kunya kpaa.

¹⁴Jijingi u or una taver nan ken angev mbu nan, kpa jijingi u uren yô, ka an nana taver unu?

¹⁵Ishima i orkavenkwagh ka i zua a mfe, ato a orfankwagh kpaa nga keren mfe.

¹⁶Iwua i or ka i sôr nan ijiir i teman, man ka i za a nan sha ishigh ki ashagbaior kpaa.

¹⁷Or u nan vande van a ityôikaa i nan yô, ka i nenge nan a mimi, kpa or u wan ndor a nan a gema a va time kwagh u nan dedoo.

¹⁸Ishor i eren ka i kure anyimanaikaa, man i pav mbaageev kpaa.

¹⁹Anmgbian u i vihi nan ishima yô, nan ngu er gar u taver nahan; inyum ngi er uishindan mba iyou i taver yô.

²⁰Ka sha atam a sha zwa u or la, man iyav mbu nan mbua ide ye, ka sha mtser u sha zwa u nan nana lu kiva kiva ye.

²¹Ku kua uma mba ken tahav mbu nombor, mba ve doo a u la, vea zua a atam a u.

²²Or u nan er kwase yô, ka kwagh u doon je nan zough a mi ye, doo TER a nan.

²³Mbaatsanev ka ve ôron kwagh sha zamber, kpa mbanyarev yô, ka ve ôron kwagh sha nomor.

²⁴Or u nan lu a akar kpishi yô, nan ngu timin a tim iyol i nan, kpa huror ngu u a hembe varen a anmgbian yô.