Read tiv Anzaakaa 2 Bible Online

Anzaakaa 2 - tiv bible

Anzaakaa 2

¹Wan wam, aluer u ngohol akaaôron am, man u koso atindi am her a we,

²je, er u ver ato ou sha kwaghfan, u ver ishima you sha mkav yô,

³een, aluer wea yila mkav, wea genger imo sha u keren mkav yô,

⁴aluer wea ker un er azurfa nahan, man wea ker un er akaa a injaa a i yer yô,

⁵nahan ú kav mcie u cian TER, mfe u fan Aôndo kpaa, ú zua a mi.

⁶Gadia TER ne kwaghfan, mfe kua mkav mba dugh ken zwa Na;

⁷ka A veren myom sha ci u mbaperapera, Un ka perutya u mba ve zenden sha mimi yô;

⁸ka A kura igbenda i mimi, shi A sôron gbenda u mba i doo Un a ve la.

⁹Nahan ú kav perapera kua mimi man m-er u vough, een, hanma gbenda u dedoo kpaa.

¹⁰Gadia kwaghfan una nyôr u ken ishima, mfe una doo u ken uma wou;

¹¹m-er u sha inja una kuran we, mkav kpaa una kumban we,

¹²sha u á yima u sha gbenda u ifer, sha ikev i ior mba ôron akaadang;

¹³mba ka ve undu igbenda i perapera, sha u zenden ken akaa a imegh la;

¹⁴mba ve ember sha u eren ifer, ka doon ve iyol a ifer i dang;

¹⁵mba igbenda ve i hur i te aningir, mba eren dang ken zende ve;

¹⁶sha u á yima u sha ikev i kwase u u fe nan ga yô, ka kwase u i fe nan ga, u nan er kwagh sha zwanyohon yô,

¹⁷u nan gbihi ikar u nan u uye la, man ikuryan i Aôndo u nan kpaa i hungul nan;

¹⁸gadia ya u nan ngu hungwan shin ku, igbenda i nan kpaa i sen shin ujijingi mba mbakpenev;

¹⁹mbazan her a na cii, mô hir ga, mba ar sha igbenda i uma kpaa ga;

²⁰sha u ú zenden sha gbenda u ior mba mimi, man ú karen sha igbenda i mbaperapera

²¹gadia mbaperapera vea tema sha tar, man mbajighjigh kpaa vea tema sha u gbem.

²²Kpa aferaior yô, á tim a sha tar kera, man mbakoron ior ndiar ave kpaa, á wuhe ve kera.