Read tiv Anzaakaa 27 Bible Online

Anzaakaa 27 - tiv bible

Anzaakaa 27

¹De sugh kwagh iyol you sha ci u kper ga, gadia u fa kwagh u iyange ia va a mi ga.

²De orgen nana̱ wuese we, i̱ de lu zwa wou ga, i̱ lu or u u fe nan ga yô, i̱ de lu zwa wou ga.

³Iwen ka kwagh u yuhwan je, waarawa kpaa yuhwa, kpa ishimavihin i ibumeor hemba akaa ahar ne cii.

⁴Ishima i nyoon ka ipilakwagh u bo, iyugh di ka kwagh u usan haan inya, kpa iwuhe yô, ka an nana fatyô u tilen i sha ishi?

⁵Guda myange u ken igbar, a dooshima u a lu ken myer la.

⁶Avav a huror a gber a la, ka kwagh u mimi, kpa ijôsusen i orihom yô, ngi wuee.

⁷Or u nan idi yô, zaryoughough je kpaa ka u ndôhôr nan ishima, kpa or u ijen i ker nan yô, hanma kwagh u yuan kpaa ka nan kwagh u nyohon.

⁸Er ngôinyon ka a undu iya na a zenden ca nahan, kape or u nan zenden ca a ya u nan nan lu la.

⁹Mkurem ma shighen kua kwaghhumandoon mba ne ishima i saan saan, kape mdoom ma ikar u or ma ma dugh ken mhen u gbar gbar ma lu la.

¹⁰Huror wou man huror u teru yô, de te ve kera ga; de nyer hen ya u anngôu sha iyange i ican i tser u la ga; guda or u wan ndor a we, u nan lu ikua ikua, a anngô, u a lu ca la,

¹¹Wan wam, lu orfankwagh, na i̱ saan mo iyol, sha er me gema me kaa imo a or u a laham yô.

¹²Orfankwagh ka nan nenge a kwaghbo, nan yer, kpa mbalanenkwagh yô, ka ve kar ve za ya ican.

¹³Ngohol ikondo i or u nan hingir ishuur yô, man shi kôr un a̱ hingir ityungu sha ci u kwase u nan ve a va yô.

¹⁴Or u nan ver ikar u nan dedoo sha imo i genger genger, pepe pepe yô, á hingir er ka ifan nan we i nahan.

¹⁵Mnende u lugh lugh sha iyange i ura yô, ka kwagh môm a kwase u iyongo.

¹⁶Or u i sar nan ka yangen un yô, ka ahumbe nan yange ye, uwegh ku yanegh ku nan kpaa ku bende a mkurem.

¹⁷Iyôgh ka ki wua iyôgh, kape or kpaa ka nan wua orgen la.

¹⁸Hanma or u nan kor kon u tur yô, nana ya atam a u, or u nan we orvesen u nan iko yô, á civir nan.

¹⁹Er ishigh ka ki nenge ishigh ken mnger nahan, kape ishima i or kpaa ka i tese mlu u or la.

²⁰Sheol man Abadon mba idi je ga, kape ashe a or kpaa a idi mayange ga la.

²¹Adum ngu sha ci u sôron azurfa je, usu iwaagh kpaa ngu sha ci u zenaria, or kpaa mba karen nan sha kwagh u nan wuese yô.

²²Shin aluer wea kume ibumeor shin akpela sha tor a samuyia imôngo je kpaa, nahan kpaa ibumegh ki nan kia pav a nan ga.

²³Nôngo fa mlu u ikumiyôngo you, nenge sha akumauile a ou doo doo kpaa;

²⁴gadia inyaregh ki lu gbem ga; idyer i tor ia lu sha ikov ikov cii kpa?

²⁵Zum u toho ua bee kera, man gwergwe una mende, man á kohol ahu a sha iwo á ombo a yô,

²⁶ônovmbaiyôngov vea lu sha ci u akondo a ou je, man ivo kpaa sha ci u yamen sule a mi,

²⁷atumba a ivo kpaa aa kuma u kwaghyan wou man kwaghyan u ior ou cii, kua kwaghyan u mbayevkasev mba shilen we tom kpaa.