Read tiv Anzaakaa 8 Bible Online

Anzaakaa 8 - tiv bible

Anzaakaa 8

¹Kwaghfan ngu yilan gaa, mkav kpaa ngu genger imo gaa?

²Sha ajiir a taven sha, hen gbenda, hen akahar a igbenda, ka a tile her;

³hen ihinda i nyôron ken gar, hen ape nyôron sha ihinda la, ngu genger imo er:

⁴M ngu yilan ne, ne nomso cii, ikenge yam i kaan kpaa ngi zan hen ônov mba iorov.

⁵Ne mbalanenkwagh, fa nen u eren sha uee; ne abumeaior kpaa, fa nen u eren sha inja.

⁶Ver nen ato, me ôr akaa a hemban doon, mbugh u zwa wam kpaa una lu sha akaa a vough je.

⁷Gadia zwa wam ua ôr kwagh u mimi; iferkwagh yô, ka zwa wam kwagh u ndôhôrshima je.

⁸Akaaôron a ken zwa wam cii ka a perapera, ma kwagh u huren shin u icughugh ngu ken a kpaa ga.

⁹Or u nan kav yô, a cii nga nan ken igbar, mba ve zough a mfe kpaa, nga ve vough je.

¹⁰Ngohol ityesen yam, i̱ de lu azurfa ga; ngohol mfe, guda un, a zenaria u hemban doon cii.

¹¹Gadia kwaghfan hemba urubi ca je, man akaa a a sar u cii a kuma sha na ga.

¹²Mo, kwaghfan ne, m gema m-er u sha uee hingir mo ijiir i teman ker, m zua a mfe u fan m-er u sha inja.

¹³Mcie u cian TER yô, ka u vendan kwaghbo je; iyolmoron man iceen man gbenda u bo kua zwa u u er kwagh sha ifer yô, m vende.

¹⁴Mhen ka u wam je, kua kwaghfan u mimi; mo m ngu mkav; m ngu a tahav.

¹⁵Ka sha a mo utor ve tem tor, man mbatarev kpaa ve kur ajir ye.

¹⁶Ka sha a mo mbakurantar ve kor tar ye, kua mbavesen kpaa, man mbaajiriv mba shin tar cii.

¹⁷Mba m doo ve ishima la, mo kpaa ve doom ishima; mba ve keren mo sha gbashima yô, vea zua a mo.

¹⁸Inyaregh ki hen a mo kua icivir kpaa, een, icôronnyar kua perapera.

¹⁹Atam a am hemba zenaria, een, hemba zenaria u wang; mtser wam kpaa hemba azurfa u hemban doon cii.

²⁰M ngu zenden sha gbenda u perapera, ken atô u igbenda i ijirigh i mimi,

²¹sha u me er mba m doo ve ishima la, vea ya dyako sha akaa, man sha er ne iv ayou a ve a ombon akaa ker la.

²²TER lu a mo sha mhii u gbenda Na je, je er ityom Na lu a lu ga, tsuaa la je,

²³I verem m lu sha uichôronmbaashighev mba ngise la, ka sha mhii u akaa er i lu a gba tar ga la je.

²⁴Er aivamnger lu a lu ga la, i marem, er ambor a lun a mngerem kpishi lu a lu ga la.

²⁵Er i lu a tim iwo ga, man er agungu kpaa lu a lu ga je, tsô i maren;

²⁶er A lu a gba tar shin mkôngom kpaa ga, shin vuulevu u hiihii u sha won kpaa ga.

²⁷Zum u A er Usha la m lu her je, zum u A samber ishigh ki aivamnger gbilititi la,

²⁸zum u A ver abeen a Sha, zum u ambor a aivamnger taver,

²⁹zum u A ver zegemnger ikighir na, sha u mngerem ma de karen imo Na ga yô, 2 zum u A tim imagh ki taregh la,

³⁰shighe la, m lu vea Na, er or u fan tom nahan, hanma iyange m lu saan saan gbem, m lu ember sha ishigh Nagh gbem,

³¹m lu ember ken tar Na u sha won cii, doom a ônov mba iorov tsung.

³²Hegen yô, ne ônov, ver nen ato her a mo, gadia saan mba ve we igbenda yam iko la, iyol.

³³Ungwan nen ityesen, lu nen mbafankwagh, de vende nen i ga.

³⁴Á saan or u nan ongom la, iyol, er nan kor hen ihinda yam hanma iyange, nan keghen hen ambusu a ihinda yam yô.

³⁵Gadia or u nan zough a mo, ka uma nan zough a mi ye, á doo TER a nan kpaa.

³⁶Kpa or u nan karem kpe yô, nan ngu vihin uma u nan iyol i nan je; mba ve vendem cii, ka ku u doo ve ye.