Read tiv Orpasenkwagh 7 Bible Online

Orpasenkwagh 7 - tiv bible

Orpasenkwagh 7

¹Iti i mimi hemba doon a mkurem ma doon tsung; man shi iyange i kuugh hemba doon a iyange i maren or la.

²Guda u zan hen ya u mlia a u zan hen ya u iniongo, gadia ngula ka mkur u ior cii, or u uma nana̱ lu a kwagh ne ken ishima i nan.

³Ishima i vihin hemba doon a ahan a sen; gadia ka sha ishigh ki tsughur, ishima i hingir dedoo ye.

⁴Ishima i mbafankwagh ngi sha ya u mlia, kpa ishima i abumeaior yô, ngi sha ya u ahan.

⁵Guda u ungwan tsaha u orfankwagh a u or á ver ato sha icam i abumeaior.

⁶Gadia er m-baver u agbaa a saa shin atô a ityegh a lu nahan, kape mse u ibumeor a lu la; kwagh ne kpaa ka gbilinkwagh je.

⁷Mimi je inyaregh ki ngohol sha apera ka ki gema orfankwagh nan hingir ibumeor, inyaregh ki yamen ishô ki vihin mkav kera.

⁸Guda mkur u kwagh a mhii na; orwanshima hemba doon a orimangeregh.

⁹De nyoon ishima fefa ga, gadia ishima i nyoon tema ken vanger u abumeaior.

¹⁰De kaan wer: Ka nyi ayange a tsuaa la a hembe doon a ahegene? ga. Gadia ka sha kwaghfan u pin kwagh ne je ga.

¹¹Kwaghfan ngu a inja er dyako nahan, ngu a inja hen ior mba ve nengen a iyange yô.

¹²Gadia kwaghfan kor or sha kwagh u vihin di er inyaregh nahan kpaa; kpa mhembe u mfe yô, ka er kwaghfan a kor uma u or u nan lu a mi la.

¹³Ver ishima sha tom u Aôndo; gadia ka an nana fatyô u naregh kwagh u Un A vande hurene?

¹⁴Sha iyange i mkpeyol yô, ember, sha iyange i ican yô, hen kwagh ken ishima: ngin kpaa Aôndo er i di er ngila nahan, sha u or nana̱ de fe ma kwagh u una va er ken ijime i nan la ga yô.

¹⁵M nenge a akaa cii sha ayange am a gbilinigh; orperapera ngu, u ka nan saa ishe shin er nan lu perapera nahan kpaa; iferor ugen di kpaa ngu, u ka nan gema nan tsa sha won a ifer i nan yô.

¹⁶De eren perapera a̱ karen ikaa inya ga, man shi de luun a kwaghfan a̱ karen ikaa inya ga; inja na nan man ú va tim iyol youwe?

¹⁷De eren ifer i̱ karen ikaa inya ga, man shi de eren ibumekwagh kpaa ga; inja na nan ú kpe je er shighe wou a lu a kuma ga?

¹⁸Doo u ú kôr ngun, ngula di kpaa de kera tôôn uwegh ough sha mi kera ga; gadia or u cian Aôndo yô, nana due ken akaa la cii.

¹⁹Kwaghfan ka a na orfankwagh agee je, a hemba mbatarev pue mba ve lu ken gar yô.

²⁰Gadia ma orperapera môm u shin tar u nan eren kwagh u dedoo nan eren isholibo ga, nan ngu ga.

²¹Man shi de we iko sha akaa a i lu ôron la cii ga, sha u de va ongo er kpan wou a toho u ga;

²²gadia we iyol you kpaa u fa ken ishima you er acin imôngo u toho mbagenev kpaa yô.

²³Akaa ne cii, m kar a sha kwaghfan, m kaa mer: Me hingir orfankwagh; kpa a gba ca a mo.

²⁴Kwagh u a lu yô, ngu ca tsô, a za kpishi je; ka an nana fatyô u timen fan unu?

²⁵M gema m ver ishima yam mer, me fa, me time, me ker kwaghfan kua atôakaa, sha u me fa er ifer i lu ibumekwagh man ibumegh kpaa ki gem ki lu ihundugh yô.

²⁶Tsô m gema m zua a kwagh ugen ua hembe yuan a ku yô; ka kwase u ishima i nan i lu ityamberev mbi hônon kua ukper yô, ave a na kpaa a lu mshirim; or u i doo Aôndo a nan yô, nana war un, kpa orsholibo yô, una gema á kôr nan.

²⁷Nenge, m zua a kwagh ne, kape Orpasenkwagh a kaa la, m gba karen kwagh ugen sha ugen, m lu karen ve sha u me fa inja i hanma kwagh yô;

²⁸kwagh u ishima yam i zer keren zan zan hegen, kpa m lu a zua a mi ga yô: or môm ken ior dubu m zua a mi, kpa kwase yô, môm kpaa m zua a mi ker ga.

²⁹Nenge, ka kwagh ne tseegh m zough a mi ye: Aôndo er or dedoo, kpa mba keren u eren akaa sha ayom yum.