Read tiv Orpasenkwagh 9 Bible Online

Orpasenkwagh 9 - tiv bible

Orpasenkwagh 9

¹Gadia akaa angan cii, m time sha mi ken ishima yam, sha u henen sha a, er mbaperapera kua mbafankwagh cii a aeren a ve a lu sha ikev i Aôndo yô, shin a lu dooshima shin ihom i kôron; or fa kwagh u a lu nan ken hemen ga.

²Akaa cii nga ve sha ior inja i môm; ci môm ngu sha ci u orperapera man iferor kpaa, man ormimi kua or u wang man or u nan lu wang ga kpaa, man or u nan ne nagh kua or u nan ne ga kpaa; er ormimi nan lu nahan, kape orsholibo kpaa nan lu la; man or u bumun kpaa nan ngu er or u cian mbum nahan.

³Akaa a a eren shin tar cii yô, kwagh ne ka kwagh u vihin er kwagh u a tseren ve la cii ngu môm; man shi ishima i ônov mba iorov kpaa i iv a ifer, ihundugh kpaa ki ve ken ishima er ve lu uma yô, ken masetyô la ve yem shin mbakpenev.

⁴Gadia er or nan lu a mbaumav cii imôngo yô, ishimaverenkeghen ngi her; gadia iwa i uma hemba begha u kpen.

⁵Gadia mbaumav fa er vea kpe, yô, kpa mbakpenev yô, fa ma kwagh ga, kera mba a ma injar kpaa ga, u umbur ve tsô kpaa mba kera umbur ve ga.

⁶Dooshima ve kua ihom ve i kôron man iwuhe ve cii saa ishe ngise je; mayange je kera mba a ma ci sha akaa a a mase eren shin tar ga.

⁷Yô, ya kwaghyan wou a iember, ma wain wou a iember ken ishima, gadia Aôndo vande rumun ityom you kera ve.

⁸Akondo a ou a̱ kungun gbem, mkurem kpaa ma̱ de banen we sha ityou ga.

⁹Tema saan saan a kwase u a doo u ishima sha ayange a uma wou u gbilinigh la cii a A ne u shin tar yô, ayange a ou a gbilinigh la cii, gadia ka kwar wou u sha uma wou je la, kua ken tom wou u u ya ican sha mi shin tar yô.

¹⁰Hanma kwagh u uwegh ough ku zough a mi u eren yô, er un sha agee ou je, gadia ma tom shin mhen shin mfe shin kwaghfan mba shin Sheol henpe u ze la ga.

¹¹M shi m gema, m nenge shin tar, ayem a gban ka or u fefa nan hembe ga, ityav kpaa ka or u taver nan hembe ga, kwaghyan kpaa ngu sha ci u mbafankwagh ga, inyaregh kpaa ki sha ci u mbakavenkwagh ga, icivir kpaa ngi sha ci u mbahemban fan kwagh ga; gadia shighe man aikôr mba ve sha gbenda ve cii.

¹²Gadia or fe shighe u nan ga; er ishu i i ker shin kper u bo yô, man er inyon i i ker sha kwaghhônon yô, kape ka i kôr ônov mba iorov sha shighe u bo, zum u ka a bur ve a bur la.

¹³Shi m nenge a kwaghfan sha won er ngun nahan, lum zegekwagh je:

¹⁴Angar ugen lu, ior kpaa ngee ker ga; tsô zegetor ugen va ityav her, a va kase un, a maa igyar i utya.

¹⁵Tsô i zua a icanor u fan kwagh kimi, man un gema yima gar la sha kwaghfan na; nahan kpaa ma or kera umbur icanor shon la ga.

¹⁶Nahan m kaa mer: Kwaghfan hemba agee inja; nahan kpaa kwaghfan u icanor yô, mba lahan un, kwaghôron u nan kpaa mba ungwan un ga.

¹⁷Akaaôron a mbafankwagh a i ongo a sha bem la, hemba mnande u tor u abumeaior.

¹⁸Kwaghfan hemba ikav mbi utyav inja; kpa orsholibo môm ka nan vihi akaa a injaa kpishi.