Read tiv I Solomon 7 Bible Online

I Solomon 7 - tiv bible

I Solomon 7

¹Angahar a ou doo ken akôv wantor! Uvingir mba akooso ou mba er kwagh u hweegh nahan, tomaveegh u or u fan eev.

²Icombo you ngi er gbande u gbisha yô, u wain u i nongo un a banen ker ga yô; iyav ou mbu er tihi u alakema yô, i kase mbu sha uimondon mba ityombo.

³Atumba a ou ahar nga er ônov uhar, ônov mba ahinav mba morya nahan.

⁴Mon wou ngu er gôgôyou u taven u sha anyinor yô, ashe a ou nga er atungu a ken Heshebon hen hundagar u Bate-rabim; ihinga you ngi er gôgôyou u taven u Lebanon u a ver ishigh ken vegher u Damaseku la nahan.

⁵Ityough you ki sha iyol you er Karmel nahan, ice you i sha ityou ngi nyian dindee, i kôr tor sha ayôr a i.

⁶U doo ashe, u kuma ishima je, we u u doom ishima ne, ken akaa a saren la cii.

⁷Mtil wou ngu er ivile nahan, atumba a ou nga er asume a i nahan.

⁸M kaa mer, me unde ivile ngin, me zôr atam a i; atumba a ou ma a lu er asume a wain, ihuma i iôôn you kpaa ma i lu er atam a apel yô,

⁹zwa wou kpaa er wain u hemban doon cii yô, u a senen jighilii sha ci u u a doom ishima la, ngu nyôron sha ityumbujôôgh i mba ve yav yô.

¹⁰U a doom ishima la, m ngu u na, isharen na kpaa ngi sha a mo.

¹¹Va, we u u doom ishima ne, sé za ken toho sé za tsa ken angarev.

¹²Sé mough dindee sé za ken ishule i ikon i wain, sé za nenge kon wain ua hôm, man ikparen na kpaa ia mondo, man upomegraneti kpaa vea kpar yô. Ka keela me za na u dooshima wam ye.

¹³Atam a mkehem nga human dedoo; hen ihinda yase kpaa hanma inja i atam a dedoo nga, a he kua a tse kpaa; we u u doom ishima ne, m koso a sha ci wou.