Read tiv Yesaia 17 Bible Online

Yesaia 17 - tiv bible

Yesaia 17

¹Mkaanem ma Aôndo sha Damaseku. Nenge, mba karen a Damaseku sha, una kera lu gar ga, una hingir tihi u alôgh.

²I undu agar a Aroer, hingir ice, aa hingir ajiir a akumauile yaven inya memen her, ma or kpaa nana num a ga.

³Garutya u taver kpaa una bee ken Eferaim, tor di kpaa una bee ken Damaseku; asande a Shiria a a shi her yô, kwagh á er ve er kwagh er icivir i Mbaiserael la nahan, kape TER u akum a Sha A kaa la.

⁴Sha iyange la icivir i Yakob ia pande, mkehem nam kpaa maa bee kera.

⁵Tsô á hingir er orsundan ka nan kombor uwua u u til sha man nan sundan asagher sha uwe, een, á hingir er or ka nan yaren twar u asagher shin pev u Refaim nahan.

⁶Nahan kpaa á undu twar her, er ka i ndoor kon u olev, atam ahar shin atar a shi sha agbaa a sha man anyiin shin ataan sha agbaa a umen atam la, kape TER, Aôndo u Iserael A kaa la.

⁷Sha iyange la or nana nenge sha u A gbe nan la, ashe a nan kpaa aa gema hen Icighan u Iserael.

⁸Nana nenge sha atse a nanden nagh sha mi, tom u sha ave a nan la ga, nana gema ashe hen kwagh u ahôaveegh a nan er la ga, shin a lu Asherim shin atse a nanden kwaghhumandoon sha mi la kpaa ga.

⁹Sha iyange la agar a nan a taver la aa hingir er tar u u lu gbilin u ken ikô kua sha ityough ki uwoogh, u ior undu u sha ci u Mbaiserael la nahan, á hingir toho dang.

¹⁰Gadia Aôndo u myom wou hungul we, u kera umbur Vande wou u waren ker la kpaa ga, ka nahan man u lee ahu a mondon a dedoo man u môôr ikon i wain igen kposo ye;

¹¹sha iyange i u lôô la je, u er i i kôr, man pepe kpaa u er ivor you i mende, kpa sunda yô, ndiir kera sha iyange i uange man i ishima i vihin i á fatyô u surun i ga yô.

¹²Uwu! Ayôôso a ior kpishi, ve yôôso er ayôôso a zegemnger nahan; man ihuran i akuraior nga huran er ka ihuran i mngerem ma kpishim yô!

¹³Akuraior ka a hura er ihuran i mngerem ma kpishim yô, kpa Una zôhô a ve, tsô vea nyôngoso vea yem ca je, á num ve er imough i sha iwo, i ahumbe a purugh a i yô, man er ihundu i hiar sha ishigh ki uraahumbe nahan.

¹⁴Iyange i been, mciem ma tan iyol; er sev mbu a lu a av ga tsô, vea kera lu ga. Ka kwar u mba ve ye se ishar je la, man kwar u mba ve saren se la.