Read tiv Yesaia 21 Bible Online

Yesaia 21 - tiv bible

Yesaia 21

¹Mkaanem ma Aôndo sha desereti u zegemnger. Er uhiar mba ken tar u Imbusutariyan la, ka ve karen ve huran sha agee nahan, kape ngu a due ken ikôngo ken tar u cieryol.

²Ka mpase u ican kpishi i tesem ye: Oratseregh nan ngu eren sha atseregh, ortiminakaa di kpaa nan ngu timin. Za ityav, we Elam; za kase ityav, we Media. Me na ishimashirin ia bee cii.

³Ka nahan man awenge am a mgbough a mnyoonom, mtoghor kôrom er martoghol ka ua kôr kwase nahan; m hingir ngugh ngugh je m kera fatyô u ungwan ga, kundam iyol je m kera fatyô u nengen ga.

⁴Ishima ngi tan mo kwe, mciem tam iyol; aôndoaimegh a a doom la yô, a hingir mo ikarikase i gbidyen iyol.

⁵Mba sôron tebul, mba taren ubutu, mba yan kwagh, mba man kwagh; mough nen sha, ne atiator, shighe nen perutya mkurem.

⁶Gadia Ter kaa a mo nahan er: Za za ver orkuran, nana̱ pase kwagh u nan nenge yô,

⁷aluer nana nenge a ikum i mbaanyinyav mba ve zenden uhar uhar man ikum i ujaki kua ikum i urakumi yô, nana̱ tim ato, nana̱ ver ishima dedoo.

⁸Tsô u a nenge la ngor ikenge er: Nenge, Tere! Ka sha gôgôyou u taven u kuran sha mi ka m tile, m shi her didi; man sha ijiir yam i kuran, ka m tile, m lu heregh kuran hanma tugh.

⁹Man nenge, ikum i mbaanyinyav mba van, mba zenden uhar uhar. Tsô a gema a kaa er: Babilon gba, a gba ve, ieev mbi gban a gba mbi mbaaôndo vev cii, i hembe mbi shin inya je.

¹⁰Ior av ne mba i ndyar ne shin angahar, i gbidye ne er uwua nahan, kwagh u m ongo hen TER u akum a Sha, Aôndo u Iserael la, ka un m pase ne ye.

¹¹Mkaanem ma Aôndo sha Duma. Or ngu yilan mo ken Seir pinen mo er: Orkuran, tugh za nana? Orkuran, tugh za nana?

¹²Orkuran gema kaa er: Sev mbu van kua tugh kpaa; aluer á sar ne ka pinen yô, pinen nen; hide, shi va nen.

¹³Mkaanem ma Aôndo sha Arabia. Ka ken ikô i Arabia la, tsa nen ker, ne ior mba Dedan mba azende azende.

¹⁴Za kegh mba imura i ker ve la gbenda a mngerem, ne mba ne tem ken tar u Tema, za kohol nen mbayevese mbala a kwaghyan.

¹⁵Gadia ve yevese usanker, sanker u i tsough un la, man ada u i hende un kua ican i utya la.

¹⁶Gadia Ter kaa a mo nahan er: Er inyom i môm, sha inja i anyom a or u eren tom sha tôndo nahan la, i lu a kuma ga tsô icivir i Kedar ia bee;

¹⁷iyenge i mbaavaanev man mbaageev mba Mbakedar mba ve shi her la, ia hingir hicu; gadia TER, Aôndo u Iserael, kaa nahan.